जगतप्रसाद रेग्मी, काठमाडौँ ।
अखिल नेपाल जनजाति सम्मेलन काठमाडौँको जिल्ला भेला सम्पन्न भएको छ ।
केन्द्रीय अध्यक्ष निमबहादुर बुढाथोकीको प्रमुख आतिथ्यमा २०८२ असार २१ गते शनिबार बागबजारमा सो भेला सम्पन्न भएको हो ।
भेलाको उद्घाटन गर्दै बुढाथोकीले जनजाति सम्मेलनले स्थापनाकालदेखि भन्दै आएको गणतन्त्र र धर्मनिरपेक्षतामाथि अहिले खतरा उत्पन्न भएको बताउनुभयो ।
उहाँले भन्नुभयो– ‘हामीले गणतन्त्र र धर्मनिरपेक्षताको रक्षाका लागि प्रतिगामी खतराका विरुद्ध सङ्घर्ष गर्नुपर्ने आवश्यकता छ ।’
आफ्नो सङ्गठनले जातीय स्वशासनको लागि पनि सङ्घर्ष गर्दै आइरहेको उहाँको भनाइ थियो ।
देशमा सङ्घीयताको नाममा सामाजिक सद्भावमाथि आँच पुग्न सक्ने बताउँदै उहाँले भन्नुभयो–’अहिले अर्को खतरा भनेको जातिजातिलाई जुधाउनु हो । यसरी जनजाति आन्दोलन कमजोर हुन्छ । यस्तो जनजातिलाई भऱ्याङ बनाउने र राज्यसत्ता टिकाउने परिपाटीका विरुद्ध सङ्गठित भएर अघि बढ्न जरुरी छ ।’
अखिल नेपाल युवक सङ्घका अध्यक्ष गणेश अधिकारीले शुभकामना मन्तव्य राख्दै जातीय आन्दोलनलाई वर्गीय आन्दोलननसँग जोडेर लैजानु सही नीति हुने बताउनुभयो ।
राष्ट्रिय जनमोर्चाका केन्द्रीय सदस्य तथा बागमती प्रदेश समितिका अध्यक्ष लालबहादुर थापाले सङ्घीयता नेपालमा गलत छ भन्ने कुरा अहिले जनजाति आन्दोलनमा देखा परेको विकृतिले पनि पुष्टि गरेको बताउनुभयो ।
त्यस्तै, नेकपा (मसाल) काठमाडौँका प्रवक्ता जगतप्रसाद रेग्मीले नेपालको कम्युनिस्ट आन्दोलनमा जनजाति सम्मेलनको भूमिकाको बारेमा मन्तव्य राख्नुभएको थियो ।
भेलालाई जनजाति सम्मेलन बागमती प्रदेश समितिका सदस्य दाबा लामा, अखिल नेपाल ट्रेड युनियन महासङ्घ (अन्टुक) काठमाडौँका अध्यक्ष धनपति सापकोटा र राष्ट्रिय जनमोर्चा काठमाडौँका अध्यक्ष झबिन्द्र बेल्बासेले मन्तव्य राख्दै जातिवादी तथा साम्राज्यवादी षड्यन्त्रका विरुद्ध सङ्घर्ष गर्नुपर्ने आवश्यकतामा जोड दिनुभएको थियो ।
अध्यक्षमा यम मगर
भेलाले यम मगर अध्यक्ष रहनुभएको जनजाति सम्मेलनको १३ सदस्यीय काठमाडौँ जिल्ला समिति गठन गरेको छ ।
समितिको उपाध्यक्षमा केशव लामा, सचिवमा थानेश्वर जिएम र कोषाध्यक्ष लक्ष्मी राई रहनुभएको छ ।
त्यस्तै, सदस्यमा दाबा सोनाम लामा, सङ्गम थापा, गौरव चौधरी, दीपक थापा, दयाराम लामा, टिकाराम बम्जन, विष्णुहरि थापा र ज्ञानु राना रहनुभएको छ ।
भेलाको अध्यक्षता केशब लामाले तथा सञ्चालन अर्जुन थापाले गर्नुभएको थियो ।
