कृष्ण आचाय, भरतपुर ।
यहाँ आयोजना गरिएको रक्तदान महोत्सवमा एक हजार सात सय १७ जनाले रक्तदान गरेका छन् ।
ब्लड डोनर्स सोसाइटी नेपाल चितवन शाखाद्वारा २०८२ जेठ ३१ गते शनिबार आयोजित सो महोत्सवमा जिल्लाका सातओटै पालिकाका रक्तदाता सहभागी भएका थिए ।
सङ्कलित रगतमध्ये नेपाल रेडक्रस सोसाइटी प्रादेशिक रक्तसञ्चार केन्द्र भरतपुरले एक हजार पाँच सय ३६ युनिट र भरतपुर अस्पताल ब्लड बैङ्कले एक सय ८१ युनिट रगत स्टोर गरेका छन् ।
जुन १४ मा अन्तर्राष्ट्रिय रक्तदाता दिवस थियो । सोही अवसर पारेर सोसाइटीले उक्त महोत्सव आयोजना गरेको थियो ।
‘उपचारका क्रममा रगत आवश्यक पर्दा अभाव हुने गरेको छ तर रक्तदान गर्न मिल्ने धेरैले रक्तदान गरेको पाइँदैन । रक्तदानप्रति अग्रसर हुने सन्देश दिन यो बृहत् कार्यक्रम आयोजना गरेका हौँ’ सोसाइटीका चितवन अध्यक्ष तथा मूल समारोह समितिका कार्यक्रम संयोजक एकराज बुर्लाकोटीले भन्नुभयो ।
रक्तदान महोत्सवले एकै दिनमा एकै ठाउँमा सञ्चालित रक्तदान कार्यक्रममध्ये नेपालकै सर्वाधिक रगत सङ्कलन गर्दै राष्ट्रिय रेकर्डसमेत कायम गरेको सोसाइटीका सचिव तथा प्रचार समितिका संयोजक विपिन पाठकले बताउनुभयो ।
यसअघि लायन्स क्लब अफ काठमाडौँलगायतका संस्थाले २०७४ फागुन २५ गते विश्व कीर्तिमान कायम गर्ने उद्देश्यले काठमाडौँको टुँडिखेलमा एक हजार ५०० पिन्ट रगत सङ्कलन गरेको उहाँले जनकारी दिनुभयो । (रासस)
