काठमाडौँ । विश्व बुद्धिचाल महासंघ तथा एसियन चेस फेडरेसनको तत्वावधानमा श्रीलंका चेस फेडरेसनले ४ जुनदेखि १२ जुनसम्म आयोजना गरेको द वेस्टर्न एसियन जुनियर चेस च्याम्पियनसिप सम्पन्न भएको छ ।
प्रतियोगितामा आयोजक राष्ट्र श्रीलङकासहित नेपाल, बङ्गलादेश, भारत, काजकिस्तान, माल्दिभ्स, रसिया, तुर्कमिनिस्तान र उज्बेकिस्तान गरी ९ राष्ट्र का ५९ जना खेलाडीहरूको सहभागिता रहेको नेपाल बुद्धिचाल महासंघले जनाएको छ ।
श्रीलंकामा सम्पन्न द्रुत गतिको ब्लिट्ज चेस खेलमा नेपालका युवा खेलाडी सिएम पुरुषोत्तम सिलवालले नेपाललाई रजत पदक दिलाउन सफल भएका छन् ।
आठौँ वरियताका २१३० रेटेड सिएम पुरुषोत्तमले स्पर्धाको अन्तिम चरणमा प्रतियोगिताकै शीर्ष खेलाडी भारतका २३७९ उच्च रेटेड आइएम मायाङ्क चक्रवर्तीलाई पराजित गर्न सफल भएका छन् ।
प्रतिस्पर्धामा उज्बेकिस्तानका २१२० रेटेड एफएम अबु खाकिमोभ अकबरलिले ६ अङ्क प्रोग्रेसिभ २५।५ प्वाइन्ट जोडेर स्वर्ण पदक जितेका छन् ।
पुरुषोत्तमले प्रतिस्पर्धामा बंगलादेशका २१४२ रेटेड आइएम मनून रेजानीर सँग एक खेल गुमाउँदा अन्य ६ खेलमा उत्कृष्ट जित हासिल गर्दै सात चरणको खेलमा समान ६ अङ्क २४।५ प्रोग्रेसिभ प्वाइन्ट जोडेर रजत पदक जित्न सफल भएका छन् ।
यसैगरी पुरुषोत्तमसँग हार आत्मसात् गरेका भारतीय आइएम मायाङ्क चक्रवर्ती काश्य पदकमा सीमित रहन पुगे ।
यसअघि अन्तर्राष्ट्रिय बुद्धिचाल प्रतियोगिता अन्तर्गत सिंगापुरमा सम्पन्न फिडेको आधिकारिक प्रतियोगितामा रुपेश जैशवालले रापिड तर्फ रजक र ब्लिट्जमा काश्य पदक जितेको थियो भने कृष्ण थापाले नेपालमा भएको एशियन एमेच्योर च्याम्पियनसिपमा स्वर्ण पदक हात पारेका थिए ।
सिएम पुरुषोत्तम सिलवाल विहिवार देखि नेपालमा सञ्चालन हुने नेशनल युथ च्याम्पियनसिपमा सहभागिता जनाउन एशियन जुनियर ¥यापिड च्याम्पियनसिप छोडेर आज स्वदेश फर्केका छन् । सिलवाललाई महासंघका कोषाध्यक्ष ताराबहादुर रानाभाटले त्रिभुवन विमानस्थलमा स्वागत गरे ।
