काठमाडौँ । पूर्वराष्ट्रपति विद्यादेवी भण्डारीले आफूले कार्यकर्ता भेट्न नेकपा एमालेको अनुमति लिइरहन नपर्ने बताएकी छन् ।
एमाले अध्यक्ष केपी शर्मा ओलीलाई लक्षित गर्दै भण्डारीले आफूले कार्यकर्ता भेटेर गुटबन्दी नगरेको स्पष्ट पारिन् ।
मंगलबार बिहान विराटनगर विमानस्थलमा पत्रकारसँग कुरा गर्दै पूर्वराष्ट्रपति भण्डारीले देशभित्र घुमफिर र भेटघाट गर्ने एमाले वा एमालेका नेताहरूसँग अनुमति लिइरहननपर्ने टिप्पणी गरिन्।
‘राष्ट्रपति हुनुभन्दा पहिले, संगठित सदस्यता लिनुभन्दा पहिले नै पार्टीमा काम गरेको। चिनजान ठूलै छ। पार्टीमा त्यसरी परिचित भएको नेताले कार्यक्रमहरूमा मलाई बोलाउनु स्वाभाविकै हुन्छ’, उनले भनिन्, ‘मैले पनि समाजसँग साक्षात्कार गर्दै गर्नुपर्यो, भेटघाट गर्दै गर्नुपर्यो, के छ जनताको विचार, आकांक्षाहरू? नयाँ पुस्ता के चाहन्छन्? त्यसलाई पूरा गर्न, मैले सुरुमै भनेँ- राष्ट्रिय आकांक्षालाई साकार बनाउन हामी लाग्नुपर्छ। त्यो हाम्रो परम कर्तव्य हो। त्यसका लागि हामीले बाँचुन्जेल संघर्ष गर्नुपर्छ। नयाँ पुस्ताका लागि देशका लागि। त्यस हिसाबले देशभित्र घुमफिर गर्न मैले नेकपा एमालेका कमिटी र नेताहरूसँग अनुमति लिइरहनु पर्दैन।’
उनले ओलीले आफूलाई गुटबन्दी गरेर हिँडेको भन्नै नमिल्ने टिप्पणी गरिन् ।
‘तपाईंलाई त एमाले अध्यक्ष ओलीले गुटबन्दी गर्दै हिँडेको भनी आरोप लगाउनुभएको छ नि ?’ भन्ने पत्रकारको प्रश्नमा भण्डारीले भनिन्, ‘नेकपा एमालेका वर्तमान अध्यक्ष केपी शर्मा ओलीज्यूले जे भन्नुभयो, त्यो मलाई नै तोकेर, ताकेर भन्नुभयो होला भन्ने मलाई लाग्दैन।’
उनले थपिन्, ‘म कहिले गुटबन्दी नगरेर मेन स्ट्रिमको पोलिटिक्स (मूल धारको राजनीति) गरिरहेको मान्छे, उहाँले त्यसो भन्नै मिल्दैन। मलाई तपाईंहरूको गलत अर्थ होला भन्ने लाग्छ। सक्रिय राजनीतिमा आउँदा म अध्यक्ष हुने कुरा अरू आकांक्षीहरूलाई मनमा केही प्रश्न उठाएका हुन सक्छ। त्यल्लाई भनेको हो कि ?’
उनले आफू कुनै व्यक्तिगत आकांक्षाले सक्रिय राजनीतमा आउन खोजेको नभई राष्ट्रिय हितका लागि काम गरिरहेको दाबी पनि गरिन्।
फरक प्रसंगमा पूर्वराष्ट्रपति भण्डारीले पार्टी–पार्टीबीचमै अविश्वास भएकाले वामपन्थी एकता सम्भव नभएको धारणा पनि राखिन्।
