काठमाडौँ । सिरहा नगरपालिकाका प्रमुख डा. नवीनकुमार यादवबाट सार्वजनिक भएको पत्रकारलक्षित धम्कीपूर्ण अभिव्यक्तिप्रति नेपाल पत्रकार महासङ्घले ध्यानाकर्षण भएको जनाएको छ ।
यही जेठ १२ गते सोमबार अख्तियार दुरुपयोग अनुसन्धान आयोगको टोलीले नगरपालिकामा गरेको छानबिनको समाचार संप्रेषण भएपछि
‘कुन हैसियतमा समाचार लेखेको, पत्रकारलाई यसै छाड्दिनँ’ भनेर यादव सामाजिक सञ्जालमार्फत पत्रकार विरुद्ध खनिएको महासङ्घ सिरहा शाखाले जनाएको छ ।
महासङ्घले ‘स्वतन्त्रतापूर्वक सञ्चारकर्ममा जुट्ने स्वतन्त्रता संविधानमा निर्दिष्ट छ’ भन्दै ‘यही दायित्व निर्वाह गरेको निहुँमा पत्रकारमाथि भएको यो कर्मलाई महासङ्घले अत्यन्त निन्दनीय र प्रेसविरोधी कदमको रूपमा लिएको’ जनाएको छ ।
महासङ्घले प्रेस स्वतन्त्रताको सम्मान गर्न र यस्ता हर्कत नदोहोऱ्याउन सम्बन्धित पक्षको ध्यानाकर्षण गराएको महासचिव रामप्रसाद दाहालद्वारा जारी विज्ञप्तिमा उल्लेख छ ।
