पोखरा । राष्ट्रिय जनमोर्चासहितका पाँच राजनीतिक दलले प्रधानमन्त्रीलाई ज्ञापन बुझाएका छन् ।
पोखरा विमानस्थलसहितका स्थानीय समस्यालाई लिएर २०८२ जेठ ९ गते शुक्रबार उनीहरूले कास्कीका प्रमुख जिल्ला अधिकारीमार्फत प्रधानमन्त्रीलाई ज्ञापन बुझाएका हुन् ।
ज्ञापनपत्रमा पोखरा विमानस्थलमा देखिएको अनियमितताको छानबिन गरिनुपर्ने, फेवातालको संरक्षणबारे सर्वोच्च अदालतको फैसला कार्यान्वयन गरिनुपर्ने, पृथ्वीचोकस्थित बसपार्क निर्माणमा देखिएको ढिलासुस्ती अन्त्य गरिनुपर्ने, सहकारी वचतकर्ताको रकम संरक्षण र फिर्ता गरिनुपर्ने, मध्यपहाडी लोकमार्ग निर्माणप्रक्रियामा भएको ढिलासुस्ती अन्त्य गरिनुपर्ने, चौतारीका बरपिपल कटानी रोक्नुपर्ने, सङ्क्रमणकालीन न्यायसम्बन्धी अपारदर्शी र पक्षपातपूर्ण नियुक्ति सच्याइनुपर्ने तथा लोकतन्त्र र गणतन्त्र विरोधी गतिविधि रोक्नुपर्ने विषय समेटिएका छन् ।
विज्ञप्तिमा राष्ट्रिय जनमोर्चा कास्कीका अध्यक्ष रविमोहन ढकाल, नेपाल समाजवादी पार्टी (नयाँशक्ति) कास्कीका अध्यक्ष मेखबहादुर क्षेत्री (राजु), नेपाल कम्युनिस्ट पार्टी कास्कीका सचिव उमेश सी, क्रान्तिकारी कम्युनिस्ट पार्टी कास्कीका सचिव विक्रम थापा र नेकपा (बहुमत) का सचिव रवीन्द्र राईको हस्ताक्षर रहेको थियो ।
