केरसिंह अदै, तौलिहवा ।
राष्ट्रिय जनमोर्चाका केन्द्रीय सल्लाहकार बद्रे आलमले गणतन्त्र जनताको बलिदानीबाट आएकाले कसैले चाहदैमा राजतन्त्र नफर्किने बताउनुभएको छ ।
राजमो कपिलवस्तुद्वारा २०८२ वैशाख २६ गते शुक्रबार सदरमुकाम तौलिहवामा आयोजित सभामा मन्तव्य राख्दै उहाँले यस्तो अभिव्यक्ति दिनुभएको हो ।
नेता आलम राजमो वैशाख २० गतेदेखि सुरु गरेको जिल्लाव्यापी पालिकास्तरीय साप्ताहिक अभियानअन्तर्गतको कार्यक्रमलाई प्रमुख अतिथिको आसनबाट सम्बोधन गर्दै हुनुहुन्थ्यो ।
गणतन्त्र दशकौँदेखि जनताको सङ्घर्ष र बलिदानबाट आएको बताउँदै उहाँले कसैले चाहँदैमा राजतन्त्र नआउने ठोकुवा गर्नुभयो ।
राजतन्त्र र हिन्दु राष्ट्र भारतको चाहना भएको बताउँदै उहाँले सङ्घीयता पनि भारतको चाहनाअनुसार आएको बताउनुभयो ।
‘तर भारतीय साम्राज्यवादको भनेजस्तो सपना पूरा भएको छैन’ उहाँले भन्नुभयो ।
सभालाई सम्बोधन गर्दै नेकपा (मसाल) कपिलवस्तुका प्रवक्ता माधव भाटक्षत्रीले राजा आऊ देश बचाऊ भन्ने नारा भ्रामक प्रचार भएको बताउनुभयो ।
राजाले देश बचाउन नसक्ने किटानी गर्दै उहाँले देश र जनताको सङ्घर्षबाट बचेको तथा देश बचाउने जनता नै भएको स्पष्ट पार्नुभयो ।
जातीय समता समाजका केन्द्रीय सदस्य खगेश्वर सुनारले सङ्घीयताको कारण देश असफल हुँदै गएको धारणा व्यक्त गर्नुभयो ।
कार्यक्रममा राजमो केन्द्रीय सल्लाहकार दधिराम आचार्य, अखिल नेपाल किसान महासङ्घ (अप्फा) का केन्द्रीय उपाध्यक्ष शिव पौडेलको पनि आतिथ्य रहेको थियो ।
राजमो कपिलवस्तुका अध्यक्ष रामप्रसाद बेलबासेको अध्यक्षता तथा शशि सापकोटाको सञ्चालनमा अघि बढेको उक्त कार्यक्रममा उपस्थित जनसमुदायलाई सचिव केरसिंह अदैले स्वागत गर्नुभएको थियो ।
सभापूर्व गगनभेदी नारासहित जुलुस प्रशर्दन गरिएको थियो ।
