केरसिंह अदै, तौलिहवा ।
राष्ट्रिय जनमोर्चा कपिलवस्तुले जिल्लाका तीन ठाउँमा प्रतिगामी खतरा विरुद्ध र गणतन्त्रको रक्षाका लागि चेतनामूलक कोणसभा सम्पन्न गरेको छ ।
कपिलवस्तुको पश्चिम क्षेत्रको टिमले २०८२ वैशाख २१ गते आइतबार शिवराज नगरपालिकाको चन्द्रौटामा कोणसभा सम्पन्न गरेको हो ।
उक्त सभालाई राजमो कपिलवस्तुका सचिव केरसिंह अदैले सम्बोधन गर्दै केही पुराना पञ्च, जमिनदारले भारतको चाहना पूरा गर्न हिन्दू राष्ट्रको मागसहित राजतन्त्रको माग उठाएको बताउनुभयो ।
उहाँले २४० वर्ष पुरानो कथित स्वर्ग अहिलेका सचेत जनताले पूरा हुन नदिने विश्वास व्यक्त गर्नुभयो ।
कार्यक्रममा राजमो कपिलवस्तुका कोषाध्यक्ष तथा शिवराज नगर समितिका अध्यक्ष केहरसिंह पुनले पनि सम्बोधन गर्नुभएको थियो ।
चेतनारायण खनालले कार्यक्रमको सञ्चालन गर्नुभएको थियो ।
त्यसैगरी, शिवराज नगरपालिका वडा नं. ३ को खरेन्द्रपुरमा सम्पन्न कार्यक्रमलाई मूल प्रवाह अखिल भारत नेपाली एकता समाजका प्रतिनिधि रामबहादुर विकले र राजमो कपिलवस्तुका सचिव केरसिंह अदैले सम्बोधन गर्नुभएको थियो ।
कार्यक्रमको सञ्चालन प्रकाश विकले गर्नुभएको थियो ।
यता, पूर्वतर्फ परिचालन भएको टिमले कपिलवस्तु नगरपालिकाको जगदीशपुरमा कार्यक्रम सम्पन्न गरेको छ ।
कार्यक्रमलाई नेकपा (मसाल) कपिलवस्तुका प्रवक्ता माधव भाटक्षेत्री, राजमो कपिलवस्तुका सल्लाहकार दधिराम आचार्य र जातीय समता समाजका केन्द्रीय सदस्य खगेश्वर सुनारले मन्तव्य राख्दै गणतन्त्रवादी हात्ती पार्टीका गलत क्रियाकलापका कारण गणतन्त्रमाथि नै असन्तुष्टि बढेको तर यसको विकल्प राजतन्त्र नभएको बताउनुभयो ।
कार्यक्रमको सञ्चालन मानबहादुर नेपालीले गर्नुभएको थियो ।
