काठमाडौँ । अखिल नेपाल ट्रेड युनियन महासङ्घ (अन्टुक) का अध्यक्ष लोकराज भुसालले कम्युनिस्ट घोषणापत्रले मजदुर आन्दोलनलाई मार्गनिर्देशन गरेको बताउनुभएको छ ।
अन्टुक केन्द्रीय कार्यालयद्वारा २०८२ वैशाख १८ गते बिहीबार राष्ट्रिय जनमोर्चा केन्द्रीय कार्यालयको सभाकक्षमा आयोजित एक सय छत्तिसौँ मे दिवसको कार्यक्रममा विषयवस्तु प्रस्तुत गर्दै उहाँले यस्तो अभिव्यक्ति राख्नुभएको हो ।
‘मे दिवसको पृष्ठभूमि अत्यन्तै उज्ज्वल छ’ उहाँले भन्नुभयो– ‘सन् १८४८ मा प्रकाशित कम्युनिस्ट घोषणापत्रले मजदुर आन्दोलनलाई स्पष्ट मार्गनिर्देशन गऱ्यो ।’
पुँजीपति र मजदुरका बिचको सङ्घर्ष अहिले पनि यथावत् रहेको बताउँदै उहाँले त्यसको तीव्रता सन् १८८६ मा देखा परेको बताउनुभयो ।
उहाँले भन्नुभयो– ‘मे ४ मा मजदुर आन्दोलनमाथि अमेरिकाको पुँजीपति सरकारले कत्लेआम गरेको थियो । त्यतिखेर नौ जनाले मजदुरले वीरगति प्राप्त गर्नुभयो ।’
सोही घटनाको स्मरणमा सन् १८८९ मा फ्रेडरिक एङ्गेल्स नेतृत्वको दोस्रो इन्टरनेसनले अन्तर्राष्ट्रिय मजदुर दिवसको रूपमा मे १ लाई मनाउन थालेको बताउनुभयो ।
‘सन् १८९० देखि मे १ लाई पहिलोपटक मे दिवसको रूपमा मनाउन सुरु गरेको थियो’ अध्यक्ष भुसालले इतिहासको जानकारी दिनुनभयो ।
पछिल्लो समयमा उदारीकरणको नीति अपनाइएको सन्दर्भ प्रस्तुत गर्दै उहाँले सोही कारणले नेपालमा राष्ट्रिय उद्योगहरू टाट पल्टिएको धारणा उहाँको थियो ।
उदारीकरणले नेपालका मजदुर गम्भीर रूपले प्रभावित पारेको बताउँदै उहाँले भन्नुभयो– ‘उदारीकरणकै कारणले नेपाली मजदुरहरू थ्री डी (फोहोर, अप्ठ्यारो र खतरनाक) काम गर्न बाध्य हुनुपरेको छ ।’
मजदुरहरू पनि सङ्गठित हुँदै आएको बताउँदै उहाँले पछिल्लो समयमा विश्व ट्रेड युनियन महासङ्घसहित विश्वव्यापी रूपमा मजदुरको सङ्घर्ष चल्दै गरेको बताउनुभयो ।
उहाँले विश्वास व्यक्त गर्नुभयो– ‘आफूमाथि भइरहेको शोषण, दमन र भेदभावका विरुद्ध निर्मम सङ्घर्ष चर्काउन मजदुर वर्ग सक्षम छ ।’
