काठमाडौँ । प्रगतिशील पत्रकार सङ्घले राष्ट्रिय जनमोर्चाले आयोजना गरेको सङ्घीयता विरोधी काठमाडौँकेन्द्रित आन्दोलनप्रति सबै प्रकारको सहयोग गर्ने निर्णय गरेको छ ।
अध्यक्ष श्यामलाल पोखरेलको हस्ताक्षरमा २०८१ चैत १२ गते जारी प्रेसविज्ञप्तिमा सो जानकारी दिइएको हो ।
चैत ११ गते बसेको केन्द्रीय समितिको निर्णय सार्वजनिक गर्न जारी गरिएको सो विज्ञप्तिमा प्रगतिशीलका धेरैभन्दा धेरै साथीहरू काठमाडौँ पुग्ने र उक्त आन्दोलनको प्रचारप्रसारलाई प्रभावकारी बनाउने निर्णय गरिएको उल्लेख छ ।
यस्तो छ, विज्ञप्तिको पूर्ण पाठ :
“२०८१ चैत ११ गते सोमबार साँझ बसेको हाम्रो सङ्गठनको केन्द्रीय समिति भर्चुअल बैठकले राष्ट्रिय जनमोर्चाद्वारा सङ्घीयताको विरोधमा आगामी चैत २४–३० गतेसम्म आयोजित राजधानीकेन्द्रित आन्दोलनप्रति ऐक्यबद्धता जनाउँदै सो कार्यक्रमलाई सफल पार्न अधिकतम सहयोग गर्ने निर्णय गरेको छ ।
हाम्रो सङ्गठनले सो कार्यक्रमलाई सफल पार्न त्यससित सम्बन्धित सामग्रीलाई पहिलेदेखि महत्त्व दिएर प्रकाशन गरिरहेको विदितै छ । त्यसका साथै चैत २४ गतेदेखिको आन्दोलनलाई सहयोग पुऱ्याउन हाम्रो सङ्गठनका साथीहरू व्यापक सङ्ख्यामा भौतिक रूपमा नै काठमाडौँ पुग्नेहुनेछ । त्यस्तै, सो कार्यक्रमसित सम्बन्धित समाचार सामग्रीलाई आफूसम्बद्ध सञ्चारमाध्यम तथा देशैभरिका सबै प्रकारका सञ्चारमाध्यमसम्म पुऱ्याउन योजनाबद्ध प्रकारले काम गरिनेछ । प्रगतिशील पत्रकार सङ्घ सो कार्यक्रमको प्रचारप्रसारलाई प्रभावकारी बनाउन सबै प्रकारको सहयोग उपलब्ध गराउनेछ ।”
