काठमाडौँ । राष्ट्रिय जनमोर्चाका अध्यक्ष तथा प्रतिनिधिसभाका सांसद चित्रबहादुर केसीले नेपालीलाई हत्कडी लगाएर विश्वभरि डुलाउँदा देशकै बेइज्जती भएको बताउनुभएको छ ।
अमेरिकाबाट अवैध आप्रवासीको नाममा नेपाल फर्काउँदा नेपालीलाई सिक्री र हत्कडी लगाएर ल्याइएको प्रसङ्ग अगाडि सार्दै उहाँले यस्तो टिप्पणी गर्नुभएको हो ।
राजमो निकट विभिन्न सम्पर्क समितिले संयुक्त रूपमा २०८१ फागुन २४ गते शनिबार काठमाडौँको टोखा नगरपालिकास्थित भुतखेल पार्कमा आयोजित वनभोज कार्यक्रममा मन्तव्य राख्दै उहाँले यसबाट नेपालको स्वाभिमान पनि झुकेको दाबी गर्नुभयो ।
‘नेपालीको अवस्था कस्तो छ ? तपाईं देखिहाल्नुभयो नि’ उहाँले भन्नुभयो– ‘अमेरिकाबाट अवैध प्रवासीको नाममा नेपालीलाई फर्काउँदा सिक्री र हत्कडी लगाएर अल्बानिया हुँदै नेपाल भित्राइयो । हेर्नुस् त नेपालको कस्तो बेइज्जती ? नेपालको स्वाभिमान कहाँ गयो ।’
उहाँले नेपालीको दयनीय अवस्थाबारे अर्को उदाहरण पनि प्रस्तुत गर्नुभयो ।
‘मैले सामाजिक सञ्जालमा हेरेँ । वैदेशिक रोजगारीको सिलसिलामा खाडी पुगेकी एक जना महिला मालिकले नमिठो भनेर छोडेको जुठो खाना खाएर बाच्दी रहिछन् । खाना मिठो भएको दिन त ती महिला भोकै बस्नुपर्ने रे’ उहाँले वैदेशिक रोजगारीमा रहेका नेपालीको अवस्थाबारे सङ्क्षिप्तमा चित्रण गर्नुभयो ।
देशको खराब शासन र शासकका कारण नेपालीको यस्तो अवस्था रहेको उहाँको भनाइ थियो ।
यस सन्दर्भमा उहाँले सङ्घीयताका कारण नेपाली जनताको अवस्था झनै कमजोर भएको बताउनुभयो ।
‘सङ्घीयता विदेशीको खेती हो’ आफूहरूको सङ्घीयता विरोधी आन्दोलनको सन्दर्भ जोड्दै उहाँले भन्नुभयो– ‘जबसम्म बोकाएकाले झिक् भन्दैनन्, तबसम्म बोक्नेहरूले सङ्घीयता बोक्न छोड्दैनन् ।’
सङ्घीयता नेपाली जनतालाई पटक्कै मन नपरेको भए पनि बोकाउनेले बोकाइदिएका कारण त्यसलाई फाल्न राजमोले सङ्घीयता विरोधी आन्दोलन गर्नुपरेको उहाँको धारणा थियो ।
‘अब त बोक्नेका काँध पनि पाट्टिएका छन्’ उहाँले भन्नुभयो–’राष्ट्रको अस्तित्व बचाउन पनि सङ्घीयता खारेज गर्नुपर्ने भएको छ ।’
उहाँले जनताको आन्दोलनबाटै सङ्घीयता खारेज गर्नुपर्ने भएकाले राजमोले काठमाडौँकेन्द्रित आन्दोलन सञ्चालन गर्नुपरेको उहाँको भनाइ थियो ।
उहाँले प्रजातान्त्रिक विकेन्द्रीयता र स्थानीय स्वायत्त शासनको आधारमा देशमा शासन सञ्चालन गर्नुपर्ने आवश्यकतामा जोड दिनुभयो ।
कार्यक्रममा राजमो उपाध्यक्ष तथा प्रवक्ता दुर्गा पौडेल र राजमो केन्द्रीय सल्लाहकार तथा वामपन्थी नेता आनन्द शर्माले पनि सम्बोधन गर्नुभएको थियो ।
कार्यक्रमको आयोजना प्युठान–काठमाडौँ सम्पर्क समिति, बागलुङ–काठमाडौँ सम्पर्क समिति, अर्घाखाँची–काठमाडौँ सम्पर्क समिति, गुल्मी–काठमाडौँ सम्पर्क समिति, कर्णाली–काठमाडौँ सम्पर्क समिति, सुदूरपश्चिम–काठमाडौँ सम्पर्क समिति, दाङ–काठमाडौँ सम्पर्क समिति, रामेछाप–काठमाडौँ सम्पर्क समितिलगायतले गरेका थिए ।
