काठमाडौँ । संयुक्त राज्य अमेरिकाले अवैध ठहर गरी नेपाल फर्काइदिएका नौ जना नेपालीहरू ८०/९० लाख रुपैयाँ तिरेर त्यहाँ पुगेको प्रहरीले जनाएको छ ।

मानव बेचबिखन अनुसन्धान ब्यूरोका प्रवक्ता एवं प्रहरी उपरीक्षक नरेन्द्र कुँवरले नेपाल पुगेका व्यक्तिहरूले ८०/९० लाख रुपैयाँसम्म बुझाएर अमेरिकासम्म पुगेको बताए । त्यसबारे सोधपुछका क्रममा उनीहरूले सो खुलासा गरेका हुन् ।

‘उहाँहरूले सङ्केत गर्नुभएको छ। ५०/६० लाख, ७०/८० लाखसम्म इन्डिभिजुअल केस छ यसमा । त्यसमा यात्रको खर्च, खाना लगायतका खर्च पनि जोडिएको हो वा होइन अथवा कसलाई उहाँहरूले रकम बुझाउनुभयो त्यो चाहिँ विस्तृत अनुसन्धानबाट थाहा हुन्छ,’ प्रवक्ता कुँवरले भने।

प्रहरी अधिकारीहरूका अनुसार अमेरिकाबाट बुधवार फर्काइएका नेपालीहरूमध्ये एक महिला छिन् ।

प्रहरीका अनुसार अमेरिकाबाट निष्काशनपश्चात्‌ नेपाल आइपुगेका नेपालीहरू लुम्बिनी प्रदेशका रुकुम, रोल्पा, दाङ जिल्लाका छन् भने एक जना सुदूरपश्चिमको डोटी जिल्लाका रहेका छन्।

ती नेपालीहरू कुन माध्यम वा बाटोबाट यात्रा गरे र कहाँकहाँ गए भन्नेबारे सोधपुछका क्रममा प्रहरीलाई बताए।

‘धेरैजसो यहाँबाट मध्यपूर्व, मध्यपूर्वबाट युरोप र युरोपबाट साउथ अमेरिकाको ब्राजिलसम्म पर्यटक भिसामा गएको देखियो,’ कुँवरले भने, ‘ब्रजिल पुगिसकेपछि केही व्यक्तिले एअरलाइनको टिकट खरिद गरेर मेक्सिकोसम्म पुगेका र केही मानिसहरू सडकमार्गबाट मेक्सिको सिमानासम्म पुगेका अनि अमेरिकाको लस एन्जलस र टेक्ससबाट लुकीछिपी सीमा नाघेपछि अमेरिकी सुरक्षा बलले उहाँहरूलाई नियन्त्रणमा लिएको भन्ने बुझियो।’

बुधवार काठमाडौँस्थित त्रिभुवन अन्तर्राष्ट्रिय विमानस्थलमा ओर्लिएका नौ नेपालीलाई विमानस्थल अध्यागमन कार्यालयले सामान्य प्रक्रिया पूरा गरेपछि प्रहरीको जिम्मा लगाएको थियो । नेपाल प्रहरीको मानव बेचबिखन अनुसन्धान ब्यूरोका अधिकारीहरूले आवश्यक सोधपुछ पछि बुधबारै उनीहरूलाई परिवारको जिम्मा लगाएका छन् ।

उनीहरूमध्ये ८ जनालाई अमेरिकी चार्टड विमानमा हत्कडी लगाएर ल्याइएको थियो । यद्यपी अध्यागमनका अधिकारीहरूले यसबारे बताउन चाहेनन् ।एकजना भने आफैँ नियमित उडानबाट आएका थिए ।

विभिन्न विवरणहरूमा जनाइएअनुसार यसअघि राष्ट्रपति जो बाइडनको कार्यकालमा झन्डै ५,००० नेपालीहरू अवैध रूपमा अमेरिका प्रवेश गरेका थिए। अमेरिकाले कागजपत्र नभएका अवैध आप्रवासीहरूलाई चरणबद्ध रूपमा सम्बन्धित देशहरूमा पठाउन थालेको छ।

अमेरिकाको सरकारी तथ्याङ्कले आर्थिक वर्ष २०१९ देखि २०२४ सम्म कुल ३८९ नेपाली नागरिक देशनिकालामा परेको देखाउँछ।