काठमाडौँ । इजरायल र हमासबीचको युद्धविरामसँगै नेपाली विद्यार्थी विपिन जोशी मुक्त हुने आशा पलाएको छ ।
इजरायल र हमास समूहबीच भएको सम्झौताबमोजिम बन्धकहरू रिहा हुने भएपछि विपिन पनि मुक्त हुने इजरायलका लागि नेपाली राजदूत धनप्रसाद पण्डितले आशा व्व्यक्त गरेका छन् ।
इजरायलका राष्ट्रपतिले आफूसँगको कुराकानीका क्रममा विपिन जोशी मुक्त हुने सम्भावना रहेको बताएको राजदूत पण्डितले बताएका छन् । हालै ओहदाको प्रमाणपत्र बुझाउने क्रममा त्यहाँका राष्ट्रपतिसँग विपिनबारे पनि सङ्क्षिप्त कुराकानी भएको पण्डितको भनाई उदृत गर्दै बीबीसीले बताएको छ ।
‘सूचीमा विदेशीका नाम उनीहरूले राख्ने गरेको देखिँदैन। विदेशी बन्धकमध्ये एक नेपाली र आठजना थाई नागरिक छन्। छुट्छन् भन्ने हाम्रो आशा छ। जतिसक्दो हामीले प्रयास गरेका छौँ आशा गर्नुबाहेक हामीसँग विकल्प छैन,’ राजदूत पण्डितले भने।
विपिनका बुवा महानन्द जोशीले युद्धविराम सम्झौताले आफूहरूलाई केही हदसम्म राहत दिएको बताए।
‘छोरा फर्किन्छ भनेर बाटो हेरेर बसिरहेका छौँ। ऊ इजरायल गएको २० दिनमै त्यस्तो घटना भयो’ उनले भने ।
विपिनकी आमा पद्मा जोशीले हमास समूह र इजरेल सरकारबीच भएको युद्धविराम सम्झौताले खुशी लागेको प्रतिक्रिया दिइन्।
छ साता लामो हुने युद्धविरामको पहिलो चरणमा केही इजरायली बन्धकहरू छाडिने छ। त्यसको साटो इजरायलले प्यालेस्टिनी बन्दीहरू समेत छाड्ने र केही क्षेत्रबाट इजरायली फौज फिर्ता हुने छ।
यदि सो चरण सफल भएमा स्थायी युद्धविरामका लागि वार्ताहरू हुने छन्। यस सम्झौताले प्यालेस्टिनीहरूसम्म थप सहायता पुग्ने बाटो खोलिदिने छ।
भविष्यमा गाजामा कसले शासन गर्नेछ भन्ने र के इजरेल त्यस भूभागबाट पूर्ण रूपमा बाहिरिनेछ भन्ने सवाललाई पछि सम्बोधन गरिने छ।
बीबीसी भेरिफाइको अध्ययन अनुसार हमाससँग अझै ९४ जना बन्धकहरू छन्। तीमध्ये ३४ जनाको मृत्यु भइसकेको हुनसक्ने ठानिएको छ।
कञ्चनपुरका विपिन जोशी सुदूरपश्चिम विश्वविद्यालयमा कृषिविज्ञानका विद्यार्थी हुन्।
उनी इजरायल र नेपाल सरकारबीचको सम्झौताअनुसार कृषिविज्ञानका विद्यार्थीलाई पठाइने ‘लर्न एन्ड अर्न’ कार्यक्रमअन्तर्गत अरू विद्यार्थीसँगै इजरायल गएका थिए। उनी गाजाको सीमानजिकै एउटा कृषि फर्ममा कार्यरत थिए।
कृषि फर्ममा कार्यरत १७ जना नेपाली विद्यार्थीमध्ये १० जनाको हमासको आक्रमणमा परेर मृत्यु भएको थियो।
अरू चारजना घाइते भएका थिए भने जोशी सम्पर्कविहीन भएका थिए। अन्य दुईजना भने सकुशल थिए।
जोशीसँग एउटै फर्ममा कार्यरत रहेका र उद्धार गरेर नेपाल फर्काइएका विद्यार्थीहरूले हमासले प्रहार गरेको ग्रिनेड फालेर उनले आफूहरूलाई बचाएको बताएका थिए।
तर पछि उनलाई हमास लडाकुले लगेको ती विद्यार्थीहरूले सञ्चारमाध्यमलाई बताएका थिए।
नेपालको परराष्ट्र मन्त्रालयले दिएको जानकारीअनुसार अहिले इजरेलमा चार हजारभन्दा बढी नेपाली केअरगिभरको रूपमा कार्यरत छन्।
त्यस्तै २६५ जना विद्यार्थीहरू ‘लर्न एन्ड अर्न’ योजनाअन्तर्गत काम गर्दै सिक्नका लागि कृषि क्षेत्रमा गएका थिए।
तीमध्ये २५३ जनालाई स्वदेश फर्काइएको छ भने १० जनाको मृत्यु भएको छ।
यद्यपि इजरायलमा रहेका नेपालीहरू केही मात्रामा सरकारी विवरणमा नसमेटिएका र गैरकानुनी रूपमा इजरायलमा कार्यरत नेपालीहरू पनि रहेको अधिकारीहरू बताउँछन् ।
