दिनेस रैदास, (देउखुरी)
आन्तरिक पर्यटन प्रवद्र्धनका माध्यमबाट दिगो पर्यटन विकास गर्ने उद्देश्यका साथ देउखुरी उद्योग बाणिज्य संघ लमहीले ‘जाउँ है देउखुरी अभियान २०८१’ सञ्चालन गर्न थालेको छ ।
पर्यटकीय नगरी लमहीसहित देउखुरीमा धेरै भन्दा धेरै संख्यामा पर्यटक आकर्षण गर्ने लक्ष्यका साथ बाणिज्य संघ यतिखेर विभिन्न ठाउँमा लमही महोत्सव भ्रमणको निम्तो बाड्दै यात्रामा जुटेका हुन् ।
पर्यटनसँग सम्बन्धित सहकार्यमा अभियानलाई निरन्तरता दिँदै, बुधवार छिमेकी राष्ट्र भारतको बलरामपुर जिल्ला र तुलसिपुर नगर व्यापारी मण्डलका पदाधिकारीलाई बाणिज्य संघका अध्यक्ष कमल जंग सिंह ठकुरीले लमही महोत्सव भ्रमणका लागि उत्तरप्रदेश बलरामपुर जिल्ला उद्योग व्यापार मण्डलका माहामन्त्री दिलिपकुमार गुप्तालाई निम्तो दिनुभएको हो ।
लमहीको खस्किएको व्यापार कसरी उठाउन सकिन्छ र देउखुरीमा पर्यटकलाई कसरी भित्र्याउन सकिन्छ साथै राप्तीको प्रवेशद्धारा मानिने वर्षौँ पुरानो कोइलाबास नाकालाई नियमित रुपमा कसरी चलायमान गराउन सकिन्छ भन्ने विषयमा दुई देशका मडण्लका पदाधिकारीबीच छलफल भएको हो ।
महोत्सवमा उत्तरप्रदेश उद्योग व्यापार मण्डलका पदाधिकारीलाई सहभागी गराउन देउखुरी उद्योग बाणिज्य संघ लमहीका अध्यक्ष कमल जंगसिंह ठकूरीको नेतृत्वमा निम्तो दिन टोली भारत पुगेको थियो ।
टोलीमा बाणिज्य संघका कोषाध्यक्ष हरि थापा, महासचिव ईश्वर श्रेष्ठ, सचिव गणेश घिमिरे, सल्लाहाकार अनिल मन्त्री, सदस्य अकल अली, अजम्मरी सामुदायिक वन उपभोक्ता समूहका अध्यक्ष पवन शर्मा रिजाल र स्थानिय व्यापारी डिल्ली राज खनाल, प्रेस संयोजक शिवु खनाल र भारतीय व्यापार मडण्लका सम्पूर्ण पदाधिकारीहरूको संयुक्त सहभागी रहेको थियो ।
देउखुरी उद्योग बाणिज्य संघ लमहीको आयोजनामा माघ १० गतेदेखि २७ गतेसम्म सातौँ देउखुरी कृषि पर्यटन तथा व्यापारिक महोत्सव २०८१ लमहीको ग्रीनपार्कमा सञ्चालन हुदैँछ । महोत्सवको तयारी तीव्ररुपमा भइरहेको आयोजकले जनाएको छ ।।
