दिनेस रैदास, दाङ ।
अखिल नेपाल किसान महासङ्घ (अप्फा) का ज्येष्ठ सदस्य जोखनु चौधरी निधनको तेह्रौँ दिन श्रद्धाञ्जली सभा सम्पन्न भएको छ ।
राष्ट्रिय जनमोर्चा पालिका समितिको आयोजनामा २०८१ पुस १२ गते शुक्रबार राप्ती–४ मा सो कार्यक्रम सम्पन्न भएको हो ।
मृतकका भतिजासमेत रहनुभएका राप्ती–४ का वडाध्यक्ष तथा राजमो जिल्ला सदस्य वीरबहादुर चौधरीको अध्यक्षतामा उक्त श्रद्धाञ्जली सभा कार्यक्रम अगाडि बढेको थियो ।
राजमो राप्तीका कार्यवाहक अध्यक्ष बाबुराम थापाक्षेत्रीको सञ्चालनबाट सुरु भएको सो कार्यक्रमको पूर्वार्द्धमा मृतकप्रति स्मरणस्वरूप एक मिनेट मौनधारण गर्नुका साथै स्मृतिशेष चौधरीको तस्बिरमा अविर तथा पुष्पगुच्छा अर्पण गरिएको थियो ।
मृतकका जेठा भतिजा विनोद चौधरीको स्वागत मन्तव्यबाट सुरु भएको श्रद्धाञ्जली सभामा अप्फाका केन्द्रीय कोषाध्यक्ष प्रेमनारायण आचार्य, अखिल नेपाल बुद्धिजीवी सङ्घका केन्द्रीय सदस्य केशवराज आचार्य, अखिल नेपाल जनजाति सम्मेलनका केन्द्रीय उपाध्यक्ष रमेशमान गुरुङ, राजमो दाङका सदस्य ठाकुरप्रसाद आचार्य, राजमो राप्तीका सदस्य कमल चौधरी र लोकबहादुर चौधरीलगायतले श्रद्धाञ्जली मन्तव्य राख्नुभएको थियो ।
कार्यक्रममा भतिजा वीरबहादुर चौधरीले उहाँको जीवनीबारे सङ्क्षिप्तमा जानकारी गराउनुभएको थियो भने कान्छा भतिजा रामसमूज चौधरीले पनि शोक मन्तव्य राख्नुभएको थियो ।
त्यस्तै, श्रद्धाञ्जली सभामा अप्फा राप्तीका अध्यक्ष विष्णु चौधरी, अखिल नेपाल युवक सङ्घ राप्तीका अध्यक्ष हिमाल एमसी, रक्तिम सांस्कृतिक अभियान राप्तीका अध्यक्ष विक्रम पाण्डे र राप्ती गाउँपालिका–२ का वडासदस्य मानबहादुर पुनलगायतको उपस्थिति रहेको थियो ।
जोखनुको मङ्सिर ३० गतेका दिन ७५ वर्षको उमेरमा निधन भएको थियो ।
