टेकराज भुसाल, सन्धिखर्क ।
रोजगार सेवा केन्द्रको कार्य सम्पादनमा लुम्बिनी प्रदेशमा अर्घाखाँचीको भूमिकास्थान नगरपालिका प्रथम भएको छ ।
श्रम, रोजगार तथा सामाजिक विकास मन्त्रालयअन्तर्गत रहेको प्रधानमन्त्री रोजगार कार्यक्रममा विगत तीन वर्षदेखिको लागत साझेदारी, कार्यसम्पादन र रोजगार सेवा केन्द्रबाट प्रवाह हुने सेवाको प्रभावकारी रूपमा कार्यसम्पन्न आधारमा मूल्याङ्कन गर्दा लुम्बिनी प्रदेशमा भूमिकास्थान नगरपालिका प्रथम भएको हो ।
२०८१ मङ्सिर २१ गते शुक्रबार बुटवलमा सम्पन्न भएको सो कार्यक्रममा श्रम, रोजगार तथा सामाजिक विकास मन्त्री शरतसिंह भण्डारी, मन्त्रालयका सचिव मुकुन्दप्रसाद निरौला र प्रधानमन्त्री रोजगार कार्यक्रम राष्ट्रिय कार्यक्रम निर्देशक डण्डुराज घिमिरेले भूमिकास्थान नगरपालिकालाई सम्मानपत्र र भूमिकास्थान नगरपालिकाका रोजगार संयोजक पुष्कर मिश्रलाई कदरपत्रले सम्मान गरेको नगरप्रमुख झबिलाल थापाले जानकारी दिनुभयो ।
नगरप्रमुख थापाले “कर्मशील जनशक्ति रोजगार” कार्यक्रमबाट गत वर्ष १५७ जनालाई रोजगारी दिएको र यो वर्ष ६ सयभन्दा बढीलाई रोजगारी दिने दाबी गर्नुभयो ।
मकैको पोस्कर र थाकलबाट तयार भएका सामग्रीलाई अन्तर्राष्ट्रिय बजारीकरणको काम अघि बढेको बताउँदै नगरप्रमुख थापाले भौतिक विकासलाई मात्रै विकास भएको भन्ने मानसिकतालाई परिवर्तन गर्नुपर्नेमा जोड दिनुभयो ।
