खलङ्गा । नेपाली खस भाषाको सुरुआत भएको स्थान यहाँको सिँजा गाउँपालिकाको नराकोट बजारमा खस सभ्यताको लोकसंस्कृति विषयमा प्राज्ञिक बहस तथा सांस्कृतिक प्रदर्शनी सम्पन्न भएको छ ।
लोकवार्ता परिषद् नेपालको आयोजना र यहाँका तीन स्थानीय तह सिंजा, हिमा र कनकासुन्दरी गाउँपालिकाको संयुक्त आयोजनामा बृहत् भेला गरिएको हो ।
भेलामा यहाँको लोकसंस्कृति विषयमा कार्यपत्र प्रस्तुत तथा बहस भएको सिंजा गाउँपालिकाका अध्यक्ष पूर्णप्रसाद धितालले जानकारी दिनुभयो ।
लोकवार्ता परिषद् नेपालका केन्द्रीय अध्यक्ष भवेश्वर पङ्गेनीले खस सभ्यता जोगाउन लोकवार्ता परिषद् नेपालको स्थापना भएको र यसपटक तेह्रौँ सङ्गोष्ठी कर्णाली क्षेत्रमा गरिएको बताउनुभयो ।
कार्यक्रममा कर्णाली प्रदेश प्रमुख यज्ञराज जोशीले सिंजा सुन, हीरा र मोतीमाथिको खजना भएकाले यसको संरक्षण तथा खोजी गर्न आवश्यक रहेको उल्लेख गर्नुभयो । यहाँको खस सभ्यता जोगाउन सबै निकायको महत्वपूर्ण भूमिका रहने प्रदेश प्रमुख जोशीको भनाइ थियो ।
हिमा गाउँपालिका अध्यक्ष लक्ष्मणबहादुर शाही, सिँजा गाउँपालिका अध्यक्ष पूर्णप्रसाद धिताल र कनकासुन्दरी गाउँपालिका अध्यक्ष दामोदार आचार्यले सिंजाको सभ्यता संरक्षणका लागि सङ्घीय र प्रदेश सरकारले सहयोग गर्नुपर्नेमा जोड दिनुभयो ।
सिँजामा प्रस्तुत कार्यपत्रमा डा शशी थापा पण्डितले खस जातिको उत्पत्ति र सांस्कृतिक प्रभाव, संस्कृतिविद् शीतल गिरीले मष्टो र खस जातिबारे कार्यपत्र प्रस्तुत गर्नुभएको थियो ।
लोकवार्ता परिषद्को तेह्रौँ सङ्गोष्ठीका अवसरमा खस सभ्यताका जानकारको उपस्थिति रहेको थियो । बहससँगै खससभ्यताका सांस्कृतिक कलाहरू प्रस्तुत गरिएको सिंजा गाउँपालिकाले जनाएको छ ।
लोकवार्ताका केन्द्रीय अध्यक्ष प्राडा पङ्गेनी, सल्लाहकार प्राडा माधवप्रसाद पोख्रेल, प्राडा कुसुमाकर न्यौपाने, प्राज्ञ तथा लोकगायक यज्ञराज उपाध्याय, प्राडा धु्रवप्रसाद घिमिरे, मनोहर लामिछाने, डा शशी थापा पण्डितसहित २२ जना प्राज्ञिक व्यक्तित्व र जुम्ला निवासी पत्रकार राजबहादुर कुँवरसहितको टोलीले सुर्खेत हुँदै, दुल्लु, कालीकोट, जुम्लाको सिंजा, तातोपानी र मुगुमा प्राज्ञिक बहस गरिएको लोकवार्ताले जनाएको छ ।
सिँजाको नराकोटमा गत शनिबार सम्पन्न कार्यक्रममा स्थानीय मागल, वालोनाच, देउडानाच, धामीनाच, रोपाइँनाच, सिँगारुनाच, एकल गीतलगायत विभिन्न विधामा कला प्रस्तुत गरिएको थियो ।
