अशोक खनाल, भालुवाङ (दाङ) ।

वाणिज्य आपूर्ति तथा उपभोक्ता संरक्षण कार्यालय नेपालगञ्जले मङ्गलवार र बुधबार गरी दुई दिन राप्ती गाउँपालिका क्षेत्रको बजार अनुगमन गरेको छ ।

राप्ती गाउँपालिका, इलाका प्रशासन कार्यालय लमही र खाद्य प्रविधि तथा गुणनियन्त्रक डिभिजन कार्यालय तुलसीपुर दाङको समन्वयमा राप्ती गाउँपालिकाको वडा नम्बर १, २, ४, ५, ६ र ८ नम्बर वडाका बजार क्षेत्रको अनुगमन गरिएको हो ।

३० ओटा पसलको अनुगमन गर्दा १७ ओटा विभिन्न प्रकृतिका पसल कारबाहीमा परेका छन् । कारबाहीस्वरूप ती पसललाई पाँच हजारदेखि ५० हजार रुपैयाँ सम्मको जरिवाना गरिएको छ । त्यस्तै, केही पसलबाट म्याद नाघेका सामान बरामद गरी सामान्य निर्देशनसमेत दिइएको छ ।

आसन्न चाडपर्वमा खाद्य र गैरखाद्य वस्तुको कृत्रिम अभाव सिर्जना गर्ने र कालोबजारी गर्ने, म्याद नाघेका सामान बिक्री गर्ने, मूल्यसूची नराखेको, लेबल नराखेको, बिलिङ प्रक्रिया नमिलेको १७ ओटा पसलबाट २ लाख ९० हजार जरिवाना गरिएको छ भने १९ ओटा पसलबाट ५० हजार आठ सय तीन रुपैयाँ बराबरको अखाद्य वस्तु जफत गरी नष्ट गरिएको वाणिज्य आपूर्ति तथा उपभोक्ता संरक्षण कार्यालय नेपालगञ्जका निमिक्त कार्यालय प्रमुख विष्णुप्रसाद धितालले जानकारी दिनुभयो ।

जरिवाना गरिएका पसलमा राप्ती–२ लालमटिया स्थित मस्टमाक्रे रिजाल राइस एन्ड आयल मिलबाट ५० हजार रुपैयाँ जरिवाना गरिएको छ ।

त्यसैगरी वडा नम्बर १ भालुवाङ पुल्चोकस्थित पोख्रेल किराना पसल, रिजाल खाद्य भण्डार, अनुज इन्टरप्राइजेजबाट क्रमशः २०/२० हजार, वडा नम्बर २ को लालमटिया बजारस्थित भुसाल सप्लायर्स, आशिर्वाद किराना एन्ड कोल्ड स्टोरबाट क्रमश २०/२० हजार रुपैयाँ जरिवाना गरिएको छ ।

एवम् प्रकारले वडा नम्बर ४ का मौरीघाटस्थित शरद जनरल स्टोर, प्रशिद्धि एग्रो एन्ड प्रोसेसिङ प्रालिबाट क्रमशः २०/२० हजार रुपैयाँ, वैष्णवी जनरल गल्ला तथा मदिरा खुद्रा पसल, दाजुभाइ किराना पसलबाट क्रमश १०/१० हजार रुपैयाँ र सोही वडाकै शाही सप्लायर्सबाट ५ हजार रुपैयाँ जरिवाना गरिएको छ ।

यसैबिच, वडा नम्बर ८ को पिपरीस्थित वर्षा किराना एन्ड कस्मेटिक पसलबाट २० हजार, सोही वडाकै बिजौरीस्थित न्यू ज्ञवाली जनरल स्टोरबाट १० हजार, सोही वडाकै पिपरी स्थत गुप्ता किराना पसल, अरुण ट्रेडर्सबाट १०/१० हजार रुपैयाँ जरिवाना गरिएको छ । वडा नम्बर ५ को सन्तोष गल्ला एन्ड किराना पसलबाट ५ हजार र वडा नम्बर ६ को पत्थरगढवास्थित चौधरी गल्ला एन्ड किराना पसलबाट २० हजार रुपैयाँ जरिवना गरिएको निमित्त कार्यालय प्रमुख धितालले बताउनु भयो ।

जरिवाना गरिएका पसलका सञ्चालकलाई एक हप्ताभित्र राष्ट्रिय वाणिज्य बैङ्कमार्फत जरिवाना रकम भुक्तानी गर्न निर्देशन दिएको निमित्त कार्यालय प्रमुख धितालले बताउनुभयो । दसैँ तिहार जस्ता चाडपर्वका बेला कृत्रिम अभाव, कालोबजारी र मूल्य नियन्त्रण रोक्नका लागि सार्वजनिक बिदाका दिनमा समेत विभागले बजार अनुगमनको कामलाई तीव्रता दिएको छ ।