पोखरा । राष्ट्रिय जनमोर्चाकी उपाध्यक्ष तथा प्रवक्ता दुर्गा पौडेलले रगतसित साटेर ल्याएको गणतन्त्र खतरामा परेको बताउनुभएको छ ।
राजमो कास्कीको आयोजनामा २०८१ भदौ ८ गते शनिबार सम्पन्न कोणसभालाई सम्बोधन गर्दै उहाँले यस्तो अभिव्यक्ति दिनुभएको हो ।
‘नेपाली जनताले रगतसित साटेर ल्याएको गणतन्त्रमाथि अहिले चौतर्फी हमला भइरहेको छ’ उहाँले भन्नुभयो– ॅयसरी फेरि पनि देशमा प्रतिगमनको खतरा देखा परेको छ ।’
उपाध्यक्ष पौडेलले देशमा प्रतिगमन नहोस् र मुलुक पछाडि नफर्कियोस् भन्ने आसयले राष्ट्रिय जनमोर्चाले अहिलेको गणतन्त्र जोगाउनुपर्ने माग राखेको बताउनुभयो ।
उहाँले राजावादी शक्तिहरूको प्रयाससँगै आन्दोलनकारी शक्तिहरू सत्ता पुगेर गरेको कमजोरीका कारणले पनि गणतन्त्रमाथि आँच पुगेको धारणा राख्नुभयो ।
सम्बोधनको क्रममा उहाँले अहिले देश भ्रष्टाचारले आक्रान्त भएको बताउनुभयो ।
‘आज नेपालको नागरिकलाई भुटानी नागरिक बनाएर भ्रष्टाचार भइरहेको छ, महङ्गी अत्यधिक बढेर गएको छ’ उहाँले भन्नुभयो– ॅयतिखेर भ्रष्टाचार देशव्यापी भएको छ । यसबारेमा सरकार जवाफदेही बन्न सकिरेको छैन ।’
उहाँले भ्रष्टाचारका कारणले देशको विकास निर्माणका प्रतिफल ऋणात्मक भइरहेको तर्क राख्दै त्यसले गर्दा नेपाली युवाहरूको विदेश पलायन तीव्र बन्दै गएको बताउनुभयो ।
केन्द्रीय प्रवक्तासमेत रहनुभएका पौडेलले सङ्घीयता कारणले देशको विकास कुण्ठित भएको बताउनुभयो ।
सङ्घीयता देशका जनताको आवश्यकताको आधारमा नभएर विदेशी स्वार्थमा ल्याइएको स्मरण गराउँदै उहाँले यथाशीघ्र सङ्घीयता खारेज गरिनुपर्ने आवश्यकतामा जोड दिनुभयो ।
सङ्घीयता खारेज नगरिए देशको राष्ट्रियता, सार्वभौमिकता र भौगोलिक अखण्डता गम्भीर खतरामा पर्नेतर्फ उहाँले सचेत गराउनुभयो ।
कार्यक्रममा राजमो केन्द्रीय सदस्य तथा गण्डकी प्रदेश समितिका अध्यक्ष शङ्कर बरालले पनि सम्बोधन गर्नुभएको थियो ।
कार्यक्रमको सञ्चालन राजमो कास्कीका अध्यक्ष रविमोहन ढकालले सञ्चालन गर्नुभएको थियो ।
सभापूर्व पोखरा सभागृहदेखि पृथ्वीचोकसम्म जुलुस प्रदर्शन गरिएको थियो ।
