काठमाडौं । भक्तपुरको गट्ठाघरमा ट्राफिक प्रहरीले चेकजाँचका लागि रोकिराखेको स्कुटरलाई ट्रकले ठक्कर दिँदा महिलाको मृत्यु भएको छ ।

बा ४९ प ८९४४ नम्बरको स्कुटर ट्राफिक प्रहरीले रोकेर चेकजाँच गरिरहेको बेला ना ६ ख २१७३ नम्बरको ट्रकले ठक्कर दिएको हो ।

ट्रकले स्कुटरलाई करिब २० मिटर घिसारेको थियो । सो क्रममा महिलाको ज्यान गएपछि अवस्था तनावपूर्ण बनेको छ ।

आक्रोशित स्थानीयले ठक्कर दिने ट्रकमा आगो लगाएका छन् भने केही सवारी साधनमा तोडफोड गरेका छन् । ट्रकमा लागाइएको आगो भने प्रहरीले तत्काल निभाएको छ ।

अवस्था तनावपूर्ण बनेपछि अहिले त्यहाँ सशस्त्र प्रहरी परिचालन गरिएको छ ।

ट्राफिकले लुकेर चेकजाँच गरेको र ट्रकले एक्कासि ब्रेक लगाउँदा दुर्घटना निम्तिएको भन्दै सर्वसाधारण आक्रोशित बनेका छन् ।