काठमाडौँ । सार्वजनिक लेखा समितिका सभापति ऋषिकेश पोखरेलले संसद्भित्रै मुर्दावादको नारा लगाएका छन् ।
२०८१ साउन २९ गते मङ्गलबारको प्रतिनिधिसभा बैठकको विशेष समयमा बोल्दै नेकपा एमालेका सांसद पोखरेलले डेडिकेटेड ट्रङ्कलाइन वक्यौताको विषयमा आफ्नो चरित्र हत्या भएको भन्दै मुर्दावादको नारा लगाएका हुन् ।
सभापति पोखरेलले डेडिकेटेड ट्रङ्कलाइन बक्यौताको विषयमा प्राप्त प्रमाणतथ्यहरू भएको भन्दै प्राप्त प्रमाण तथ्यलाई कसैले असत्य प्रमाणित गरे टुँडिखेलमा झुन्डिन तयार रहेको बताए ।
उनले डेडिकेटेड ट्रङ्कलाइन बक्यौताको विषयमा अख्तियारमाथि पनि प्रश्न उठेको बताए । उनले अख्तियारलाई २०७६ सालमा सार्वजनिक लेखा समितिले गम्भीर विषयमा अध्ययन र विश्लेषण गरी कारबाही गर्नू भनेर दिएको निर्देशनलाई लामो समयसम्म छलफल नगरेको र कारबाही नगर्दा आज गम्भीर परिस्थितिको सिर्जना भएको बताए ।
सांसद पोखरेलले भने– ‘डेडिकेटेड ट्रङ्कलाइन बक्यौताका तथ्य र प्रमाण छन् । मेरा भनाइ कसैले असत्य प्रमाणित गरिदिनुस् । असत्य प्रमाणित गरिदिए मलाई टुडिखेलमा राखेर झुन्ड्याउनुस् । म तयार छु । इमानको चरित्र हत्या गरेर भ्रष्टको पक्षपोषण गर्ने सबैप्रति सिङ्गो संसदमा सबै नेपालीले सुन्ने गरी मुर्दावाद छ† मुर्दावाद छ ।’
सभापति पोखरेलले विद्युत् प्राधिकरणको १६ अर्ब छुट दिने क्रान्तिकारी हुने तर २२ अर्ब उठाउनुपर्छ भन्ने भ्रष्टाचारी कसरी हुन्छ भन्दै प्रश्न गरे । उनले अघिल्लो सरकारले १६ अर्ब कुन सेटिङमा छुट गरिएको भन्दै प्रश्न गरे । उनले राज्यको यत्रो ठुलो सम्पती दुरुपयोग गर्न नमिल्ने भन्दै बक्यौता रकम उठाउनको लागि समिति लागिपरेको दाबी गरे ।
उनले महालेखाले बक्यौता तिर भनेको २२ अर्बमा सार्वजनिक लेखा समितिमा छलफल नै नगरी १६ अर्ब छुट दिन नमिल्ने उल्लेख गरे ।
पोखरेलले आफूलाई विद्युतको बक्यौता महसुल उठाउनुपर्छ भन्दा भ्रष्टाचारीको आरोप लगाइएको बताए तर माओवादीका मन्त्री हुँदा सरकार, विद्युत् प्राधिकरण र व्यवसायीको मिलेमतोमा आयोग बनेर व्यवसायीलाई विद्युत् महशुलमा छुट दिने काम गरिएको उनको भनाइ छ । उनले पुष्पकमल दाहाल नेतृत्वको सरकारले २०८१ वैशाख २७ गते सो निर्णय गरेको जानकारी दिए ।
सांसद पोखरेलले तत्कालीन सरकारले बनाएको आयोगले १६ अर्ब रुपैँया छुट दिएको बताए ।
तत्कालीन मन्त्रिपरिषद्को बैठकले एकै दिन दुई खालका निर्णय गरेर यस्तो काम गर्नुको पछाडि आर्थिक चलखेल भएको उनको भनाइ छ । नेपाल विद्युत् प्राधिकरणभित्र व्यापक अनियमितता भएको उनले बताए । विद्युत् प्राधिकरणले आफूलाई आवश्यक पर्नेभन्दा बढी सामान हेटौँडा र भक्तपुरमा किनेर थुपारेको पोखरेलले बताए ।
उनले आफूबाट एउटा टिपोट बाहिरिएको विषयमा पनि स्पष्टीकरण दिए । व्यापारी र नेपाल विद्युत् प्राधिकरणको दलालले उक्त टिपोट बाहिर ल्याएको भन्दै आरोप लगाए ।
उनले भने– ‘माननीयहरू, जो जो चासो राख्नुभयो, त्यो टिपोट दुई/तीन जना साथीभाइलाई दिएको हो । राप्रपाका अध्यक्ष राजेन्द्र लिङदेनलाई आफैँ दिएँ । मैले विश्वास गरेर दिएँ । यो टिपोट चार जनामध्ये कसले पुर्याउनुभयो ? थाहा छैन । मैले सोचिनँ नि, व्यापारी र प्राधिकरणको दलाल एक जना माननीय हुनुहुँदो रहेछ नि त । मैले त सुझाव दिनुस् मित्र भनेँ ।’
