अशोक खनाल भालुवाङ (दाङ) ।
बढदो सवारी दुर्घटना न्यूनीकरण गर्नका लागि दाङको भालुवाङमा अन्तरक्रिया कार्यक्रम सम्पन्न गरिएको छ ।
राप्ती उद्योग बाणिज्य सङ्घ भालुवाङले २०८१ साउन १८ गते शुक्रबार उक्त कार्यक्रम आयोजना गरिएको हो ।
कार्यक्रममा पूर्वपश्चिम लोकमार्गको भालुबाङ–पुलचोक र भालुवाङ–प्युठान सडकखण्डलगायत राजमार्गमा रहेका जथाभावी सवारीसाधन चेकजाच गर्ने कार्य तत्काल हटाउनुपर्ने, सडकछेउमा रहेका ढ्याब्री पसल हटाउनुपर्ने, राजमार्गसँग सटेको राप्ती पुलको उत्तरपश्चिममा रहेको सार्वजनिक शौचालयसमेत हटाउने निर्णय भएको आयोजकले जनाएको छ ।
त्यसैगरी, पुल्चोकमा रहेको यातायात काउन्टर अविलम्ब भालुबाङ बसपार्कबाट सञ्चालन गर्ने निर्णय पनि भएको बताइएको छ ।
उद्योग बाणिज्य सङ्घ भालुवाङका अध्यक्ष सुरज खडकाको अध्यक्षता तथा वरिष्ठ उपाध्यक्ष बाबुराम थापाको स्वागत मन्तव्य र महासचिव नारायण शर्माको सञ्चालनमा सो कार्यक्रम अघि बढेको थियो ।
कार्यक्रममा राप्ती गाउँपालिकाका उपाध्यक्ष कमलापती चौधरी, इलाका प्रहरी कार्यालय भालुवाङका प्रहरी निरीक्षक अमरबहादुर माझी, राप्ती–१ का अध्यक्ष गेमबहादुर खडका, संस्थापक अध्यक्ष होमप्रसाद शर्मा, निर्वतमान अध्यक्ष जगत्प्रसाद पोख्रेल, पत्रकार महेश रिजाल, होटल व्यवसायी सङ्घ लुम्बिनीका प्रतिनिधि महेश बेलबासेलगायतले आआफ्ना धारणा राख्नुभएको थियो ।
त्यसैगरी, पुनाराम भुसाल, लेखनाथ भुसाल, अशोक बेलबासे, सुवास भुसाल, विशाल ज्ञवालीलगायतका व्यक्तित्वले पनि सडक दुर्घटनासम्बन्धी धारणा राख्नुभएको थियो ।
पछिल्लो समयमा पूर्वपश्चिम लोकमार्गको भालुवाङ क्षेत्रमा व्यापक सडक दुर्घटना हुने गरेको र कैयौँले अकालमा ज्यान गुमाउनुपरेको विषयप्रति चिन्तित हुँदै सरोकारवालामाझ उक्त कार्यक्रम गरिएको बताइएको छ ।
