काठमाडौं । मुग्लिन–नारायणघाट सडकखण्ड अन्तर्गत सिमलतालमा भएको बस दुर्घटनामा हराइरहेकामध्ये १७ जनाको शव फेला परेको छ ।
दुर्घटनाको पाँचौँ दिनसम्म १७ वटा शव फेला परेको सशस्त्र प्रहरीले जनाएको छ ।
गएको शुक्रबार (असार २८) दुईवटा बस त्रिशूली नदीमा खसेर भएको दुर्घटनामा ६२ जना बेपत्ता भएका थिए ।
आजसम्म फेला परेका १७ वटा शवमध्ये ९ वटाको सनाखत भएको छ भने ८ वटा शव पहिचान हुन बाँकी छ ।
शुक्रबार भएको सो घटनापछि जिल्ला प्रशासन कार्यालय चितवनले सोमबार (असार ३१ गते) मात्रै दुर्घटनाका ६५ जना यात्रुको परेको विवरण सार्वजनिक गरेको थियो।
जिल्ला प्रशासन कार्यालय चितवनका अनुसार वीरगञ्जबाट काठमाडौं आउँदै गरेको बाप्र०३००६ख नम्बरको एन्जल डिलक्समा २७ जना यात्रु रहे थिए भने काठमाडौंबाट गौर जाँदै गरेको प्र३००१ख २४९५ नम्बरको गणपति डिलक्समा ४१ यात्रु रहेको खुलेको छ।
गणपति बसका तीनजना यात्रु हामफलेर बाँच्न सफल भएका छन्।
हराएका बस तथा बेपत्ता यात्रुहरूको सुरक्षाकर्मीले खोजी जारी राखेका छन्।
दुईवटै बस सुरक्षाकर्मीले अझै पत्ता लगाउन सकेका छैनन्।
