काठमाडौं । सरकारले मन्त्रिपरिषदका निर्णय २४ घण्टासम्म गोप्य राख्न भएको छ । सोमबार बसेको मन्त्रिपरिषदको बैठकले यस्तो निर्णय गरेको हो ।

सरकारका प्रवक्तामा चयन सञ्चार तथा सूचना प्रविधिमन्त्री पृथ्वीसुब्बा गुरुङले सोमबारको मन्त्रिपरिषद बैठकका निर्णय सार्वजनिक गर्दै तत्काल सार्वजनिक गर्नुपर्ने विषयबाहेक मन्त्रिपरिषदका निर्णय २४ घण्टासम्म गोप्य राखिने जानकारी दिए ।

उनले भने, ‘मन्त्रिपरिषदको निर्णय २४ घण्टासम्म गोप्य रहन्छ। हामी २४ घण्टासम्म गोप्य रहन्छ भन्ने, मन्त्रीहरूले पनि त्यसलाई बाहिर लान पाउँदैनन्। प्रधानमन्त्री, मन्त्री कसैले लान पाउँदैन ।’

उनले थपे, ‘तर हामी के गर्दा रैछौँ? आजको चाहिँ आजै? तपाइँहरूले २४ घण्टापछि जानकारी पाउने विषय पनि आजै भन्दिदारैछौँ के। त्यो त हाम्रो गोपनीयताको विरुद्धमा हुन्छ। त्यसकारण अब यो दोस्रो बैठकदेखि तपाइँहरूलाई जानकारी गराउनुपर्ने मन्त्रिपरिषदका फैसलाहरू त्यो दिनमा हुन्न। २४ घण्टापछि मैले नै, प्रवक्ताले चाहिँ मन्त्रालयमा त्यो जानकारी गराउने काम हुन्छ है।’

मन्त्री गुरुङले तत्काल सार्वजनिक गर्नुपर्ने विषय भने मन्त्रिपरिषदले निर्णय गरेर सार्वजनिक गर्ने पनि सुनाए।

यस्तै, उनले एकवर्षभित्र नेपाललाई सडक बालबालिकामुक्त बनाउने निर्णय गरिएको जानकारी दिए ।

बैठकले विपदमा परी बेपत्ता भएको १० दिनपछि मृतकसरह परिवारलाई राहत दिने निर्णय पनि गरेको छ ।

‘२०८२ साल असार मसान्तसम्म नेपाललाई सडक बालबालिकामुक्त बनाउने’ मन्त्री गुरुङले भने, ‘विपतका कारण बेपत्ता भइ घटना घटेको १० दिनसम्म पनि फेला पर्न नसकेको व्यक्तिका परिवारलाई मृतक सरह राहत उपलब्ध गराउने ।’

उनले थपे, ‘यो नयाँ निर्णय हो है। राहतमा चाहिँ त्यो रहेनछ । मान्छे बेपत्ता हुन्छ, हराउँछ हैन, त्यत्तिकै त्यसको केही रहेन्छ । यसपटक यो निर्णय गरेको हो ।’

मन्त्री गुरुङका अनुसार सोमबार बसेको बैठकले प्राकृतिक प्रकोपमा मृत्यु भएकाहरूलाई राहत उपलब्ध गराउने निर्णय पनि गरेको छ ।