काठमाडौँ । नेकपा (मसाल) ले दाङ निवासी सन्तोष योगीको निधनप्रति श्रद्धाञ्जली व्यक्त गरेको छ ।
महामन्त्री मोहनविक्रम सिंहको हस्ताक्षरमा २०८१ असार २४ गते शोक वक्तव्य जारी गर्दै मसालले श्रद्धाञ्जली व्यक्त गरेको हो ।
शोकवक्तव्यमा स्मृतिशेष योगी मसालको पार्टीसदस्य भएको जानकारी दिँदै शोकसन्तप्त परिवारप्रति समवेदना पनि व्यक्त गरिएको छ ।
स्मृतिशेष योगीको निधनबाट पार्टीले अनुशासित, इमानदार र कर्तव्यनिष्ठ सदस्य गुमाएको उल्लेख गरिएको छ ।
यस्तो छ, शोकवक्तव्यको पूर्ण पाठ :
“दाङ जिल्ला गढवा–१ कालेकाटे निवासी सन्तोष योगी (कामरेड अविरल ‘ए’) २०८१ साल असार २२ गते मोटरसाइकल दुर्घटनामा परी ४४ वर्षको उमेरमा मृत्यु भएको छ । हामीले उहाँको मृत्युप्रति गहिरो दुःख व्यक्त गर्दै सन्तप्त परिवारजनप्रति समवेदना प्रकट गर्दछौँ ।
कामरेड सन्तोष योगी हाम्रो पार्टीको सदस्य हुनुहुन्थ्यो र उहाँले लामो समयदेखि वडापार्टी कमिटीमा रहेर अनुशासित र इमानदारपूर्वक जिम्मेवारी निर्वाह गर्नुभएको थियो । उहाँ विभिन्न सामाजिक सङ्घसंस्थामा पनि आबद्ध रहनुभएको थियो । उहाँको मृत्युबाट पार्टीले अनुशासित, इमानदार र कर्तव्यनिष्ठ सदस्यलाई गुमाएको छ । त्यसबाट हाम्रो पार्टीको आन्दोलनमा गम्भीर क्षति भएको छ ।
अन्तमा हामीले उहाँप्रति हार्दिक श्रद्धाञ्जली व्यक्त गर्दछौँ ।”
