काठमाडौँ । सदस्यता शुद्धीकरणसम्बन्धी विषयलाई लिएर नेपाल पत्रकार महासङ्घको केन्द्रीय कार्यालयको ताल्चा खोलिएको छ ।
आन्दोलनकारी तीन सङ्गठनका अध्यक्ष र महासङ्घका अध्यक्ष तथा महासचिवमाझ २०८१ जेठ २० गते आइतबार भएको दुई बुँदे प्रतिबद्धतामा हस्ताक्षरसँगै ताल्चा खुलेको हो ।
दुई बुँदे सहमतिमा सदस्यता नवीकरण, नयाँ सदस्यता प्रदान, स्थानान्तरण र शुद्धीकरणको सवालमा प्रस्तुत गरिएका मागहरू महासङ्घले पूरा गर्ने र त्यसबापत आन्दोलनकारी पत्रकार सङ्गठनले ताल्चा खोल्ने उल्लेख छ ।
प्रतिबद्धतापत्रमा समाजवादी प्रेस सङ्गठनका अध्यक्ष विश्वमणि सुवेदी, प्रगतिशील पत्रकार सङ्घ नेपालका अध्यक्ष श्यामलाल पोखरेल र प्रेस मञ्च नेपालका महासचिव अवधेश झाको हस्ताक्षर रहेको छ ।
त्यस्तै, पत्रकार महासङ्घको तर्फबाट अध्यक्ष विपुल पोखरेल र महासचिव रोशन पुरीले हस्ताक्षर गर्नुभएको छ ।
ताल्चा खोल्नुअघि आन्दोलनकारी सङ्गठनको तर्फबाट विश्वमणि सुवेदी र महासङ्घको तर्फबाट विपुल पोखरेलले सङ्क्षिप्त मन्तव्य राख्नुभएको थियो ।
यसअघि, प्रेस काउन्सिलको सभाकक्षमा पत्रकार महासङ्घ र विभिन्न पत्रकार सङ्गठनमाझ छलफल सम्पन्न भएको थियो ।
कार्यक्रममा प्रगतिशील पत्रकार सङ्घका अध्यक्ष श्याम पोखरेल, जनपत्रकार सङ्घका अध्यक्ष शेरबहादुर विश्वकर्मा, समाजवादी प्रेस सङ्गठनका अध्यक्ष विश्वमणि सुवेदी, प्रेस सेन्टरका अध्यक्ष विष्णु सापकोटा, प्रेस चौतारीका अध्यक्ष गणेश बस्नेत र प्रेस युनियनका अध्यक्ष शिव लम्सालले आआफ्ना सङ्गठनको धारणा राख्नुभएको थियो ।
त्यस्तै, पत्रकार महासङ्घको तर्फबाट अध्यक्ष विपुल पोखरेल, वरिष्ठ उपाध्यक्ष रमेश विष्ट र महासचिव रोशन पुरीले मन्तव्य राख्नुभएको थियो ।
