काठमाडौं । शिक्षामन्त्री सुमना श्रेष्ठप्रति नेकपा (एमाले) का अध्यक्ष केपी शर्मा ओलीले गरेको टिप्पणी यतिबेला सामाजिक सञ्जालमा भाइरल भएको छ ।
अध्यक्ष ओलीले शिक्षामन्त्री सुमनाप्रति लक्षित गर्दै भनेका छन् ,‘नेपाल घुम्न आकी, विदेशको को केटासँग बिहे गरिन् उतैतिर कता हो, नेपाल घुम्न आकी मन्त्री पो भइन् ।’
स्रोतका अनुसार गत साता झापामा विद्यालय व्यवस्थापन समिति महासंघका प्रतिनिधिसँगको कुराकानीमा सो टिप्पणी गरेका हुन् ।
सत्तासाझेदार दल राष्ट्रिय स्वतन्त्र पार्टीकी नेत्री सुमना विदेशी नागरिककी पत्नी हुन् ।
रास्वपाबाट समानुपातिक सांसद सुमनाले यही जेठ ८ गते सार्वजनिक गरेको सम्पत्ति विवरणमा आफ्ना श्रीमान् पोल्यान्डका नागरिक पाबल स्वविन्सको रहेको उल्लेख गरेकी छन्।
तर, नेपालको शिक्षा, विज्ञान तथा प्रविधिमन्त्री बनेकी उनीसँग ओली असन्तुष्ट देखिएका छन् ।
विद्यालय व्यवस्थापन समितिको अनुमतिबिना शिक्षक सरुवा गर्ने निर्देशिका पारित हुनुअघि व्यवस्थापन समिति महासंघका अध्यक्ष गुणराज मुक्तानलगायत प्रतिनिधिहरूले त्यसलाई सच्याउन माग गर्दै ओलीसँग भेटेका थिए। सोही प्रशंगमा ओलीको यो टिप्पणी आएको हो ।
पूर्वप्रधानमन्त्रीसमेत रहेका ओलीको यो भिडिओ क्लिप्स अहिले सामाजिक सञ्जालमा भाइरल भइरहेको छ।
उक्त भिडिओप्रति विभिन्न टिका टिप्पणी भएको छ । सो भिडिओ क्लिप्स एक्समा सेयर गर्दै रास्वपाका केन्द्रीय सदस्य गणेश कार्कीले आपत्ति जनाएका छन् ।
उनले एमाले अध्यक्ष ओलीलाई ‘लिंगद्वेषी’को आरोप लगाएका छन्। उनैसँग मिलेर प्रचण्ड सरकारमा सहभागी भएको आफ्नो पार्टीको समेत कार्कीले आलोचना गरेका छन्।
‘यिनै लिंगद्वेषी ओलीसँग हल लागेर प्रचण्ड बोक्न पुगेका हामी र हाम्रा साथीले यत्तिको अपमान, व्यंग्य पचाउन बानी पार्नुपर्ने हो सायद’, कार्कीले लेखेका छन्, ‘तर यिनीहरूलाई भन्नचैँ पर्छ- देश पुरुषको मात्र हैन। देश पुरुषको घर र महिलाको माइत हुन्न। विदेश जाने बाध्यता र फर्किने चाहना सबैका लागि बराबर छ।’
सुमना लक्षित ओलीको टिप्पणी:
विदेशी केटासँग बिहे गरेकी छिन्, नेपाल घुम्न आएकी मन्त्री पो भइन्। pic.twitter.com/o7I6KSFvzl— Sunil Paudel (@mama_shr33) May 31, 2024
