काठमाडौँ । गत जेठ ५ गतेको वक्तव्यको सन्दर्भमा नेकपा (मसाल) का महामन्त्री मोहनविक्रम सिंहले स्पष्टीकरण दिनुभएको छ ।
सीमा समस्या समाधानको सन्दर्भमा कालापानी शब्द उल्लेख नभएकाले उत्पन्न अस्पष्टतालाई प्रष्ट पार्न महामन्त्री सिंहले सो स्पष्टीकरण जारी गर्नुभएको हो ।
महामन्त्री सिंहको हस्ताक्षरमा २०८१ जेठ ७ गते सोमबार जारी प्रेसवक्तव्यको पूर्ण पाठ यस्तो छ :
“सहकारी प्रकरण र सरकारको नीति प्रकरणसमेतबारे २०८१ जेठ ५ गते जारी गरिएको मेरो वक्तव्यमा केही प्रसङ्ग फरक पर्न गएकाले त्यसलाई सच्याउनको लागि यो स्पष्टीकरण जारी गरिएको छ ।
सरकारको नीति र कार्यक्रमसम्बन्धी वक्तव्यमा लेखिएको छ : “सीमा समस्या समाधानका लागि कूटनीतिक पहल गरिने छ ।” त्यो वक्तव्य लेख्ने बेलामा मसित नीति र कार्यक्रमसम्बन्धी वक्तव्यको मुल कपी थिएन । त्यसकारण मैले नीति र कार्यक्रमको त्यो भनाईलाई आफ्नो सम्झनाको आधारमा वक्तव्यमा यसरी लेखेको थिए ः “नीति र कार्यक्रममा कालापानीमा भारतद्वारा कब्जा गरिएको भूमिलाई तत्काल फिर्ता लिने कुरा गरिएको छ ।” नीति र कार्यक्रममा सीमा समस्याको समाधान भनेर जुन कुरा लेखिएको छ, त्यो कालापानीसित नै सम्बन्धित भएको कुरा प्रष्ट छ तैपनि त्यसमा कालापानी भनेर उल्लेख नगरिएको हुनाले मेरो वक्तव्यमा कालापानीको उल्लेख गरिएको भनेर लेख्नु सही हुन गएको छैन । त्यसकारण त्यसलाई मैले सच्याउन चाहन्छु तैपनि नीति र कार्यक्रममा सीमा समस्याको समाधानका लागि कूटनीतिक पहल गरिने छ भनेर जुन कुरा लेखिएको छ, त्यो पर्याप्त छैन र त्यसैले वक्तव्यमा त्यसका लागि “अन्तर्राष्ट्रियकरण गर्ने” कुरामा जोड दिइएको छ । हाम्रो यो विश्वास छ कि त्यस प्रकारको अन्तर्राष्ट्रियकरणबिना नेपालको भूमि फिर्ता लिनु सम्भव छैन र त्यसैले हामीले बारम्बार त्यो कुरामा जोड दिदै आएका छौँ ।”
२०८१ जेठ ७ गते मोहनविक्रम सिंह महामन्त्री
