भरतपुर । सहकारीको अर्बौं रुपैयाँ ठगेर फरार गितेन्द्र (जीवी) राईबारे प्रधानमन्त्री र गृहमन्त्रीबीच आरोप प्रत्यारोप चलेको छ ।
जीवी राईका व्यवसायिक साझेदारसमेत रहेका र सहकारी प्रकरणमा मुछिएका गृहमन्त्री रवि लामिछानेले राईलाई अघिल्लो सरकारले भगाएको आरोप लगाएका थिए । प्रधानमन्त्री प्रचण्डले भने उनको आरोपको खण्डन गर्दै ‘बेतुकका कुरा’ भनेका छन् ।
शनिबार चितवन पुगेका गृहमन्त्री लामिछानेले जीवी राईलाई अघिल्लो सरकारले भगाएको बताएका थिए । अघिल्लो सरकार पनि पुष्पकमल दाहाल प्रचण्डकै नेतृत्वमा थियो भने माओवादीकै नारायणकाजी श्रेष्ठ गृहमन्त्री थिए ।
प्रधानमन्त्री दाहालले जीवी राई भगाएको भन्ने लामिछानेको आरोप अस्वीकार गरेका हुन् ।
भरतपुर विमानस्थलमा आइतबार पत्रकारहरूसँग कुरा गर्दै दाहालले जीबी राईलाई अघिल्लो सरकार र प्रधानमन्त्रीले भगायो भन्नु बेतुकका तर्क रहेको बताए ।
‘वाहियात कुरा हो त्यो, कुतर्क कसैले पनि गर्न हुँदैन’, दाहालले भने, ‘जीबी राईलाई ल्याउनपर्छ भन्ने कुरामा सरकार प्रष्ट छ ।’
प्रधानमन्त्री दाहालले भने, ‘त्यो पासपोर्टको इस्युले गर्दा अलिकति समस्या भएको छ । त्यसलाई हल गर्न खोजिँदैछ । अघिल्लो सरकारले, प्रधानमन्त्रीले, अघिल्लो गृहमन्त्रीले भगायो भन्नु बेतुकका कुरा हुन् ।’
दाहालले संकटग्रस्त सहकारीबारे अध्ययन गर्न समिति बनाउन सकिने बताएका छन् ।
तर, प्रधानमन्त्री दाहालले सहकारीको करोडौं रकम अपचलन र ठगीमा मुछिएका गृहमन्त्री लामिछानेका बारेमा नेपाली कांग्रेसले माग गर्दै आएको संसदीय छानविन समितिका बारेमा अस्वीकार गरेका छन् ।
प्रमुख प्रतिपक्षी नेपाली कांग्रेसले सहकारी प्रकरणमा उपप्रधान तथा गृहमन्त्री लामिछाने जोडिएकोले संसदीय छानबिन समिति गठन गर्नुपर्ने अडान राखेको छ ।
