काठमाडौं । नयाँ सत्तागठबन्धनका चार दलबीच आठ बुँदे सहमति भएको छ । सोमबार साँझ चार दलले आपसि भागबन्डाका विषयमा सहमति गरेका हुन् ।
सहमति पत्रमा नेकपा एमाले, माओवादी केन्द्र, राष्ट्रिय स्वतन्त्र पार्टी र जनता समाजवादी पार्टीका शिर्ष नेताले हस्ताक्षर गरेका छन् ।
सहमति अनुसार अब यिनै चार दलको सहभागितामा नयाँ सरकार गठन हुनेछ भने प्रधानमन्त्रीमा पुष्पकमल दाहाल प्रचण्डले नै निरन्तरता पाउने उल्लेख छ।
यस्तै, राष्ट्रिय सभा अध्यक्ष माओवादी र उपाध्यक्ष एमालेले लिने सहमति भएको छ। दलहरूले मन्त्रिमण्डल आपसी सहमतिका आधारमा बिस्तार गर्ने जनाएका छन्।
यसैगरी संक्रमणकालीन न्याय, शान्ति प्रक्रिया सहमतिका आधारमा टुंग्याउने, संघीयता कार्यान्वयनसम्बन्धी कानुनहरू निर्माण गर्ने तथा सरकारमा सहभागी दलहरूबीच साझा न्यूनतम कार्यक्रम तय गर्ने उल्लेख छ।
नयाँ गठबन्धनमा सहभागी हुन चाहेको सिके राउत नेतृेत्वको जनमत पार्टी र रेशम चौधरीको नागरिक उन्मुक्ति पार्टीलाई सहमतिमा सामेल गरिएको छैन ।
आइतबार मध्यराति प्रधानमन्त्री पुष्पकमल दाहाल प्रचण्डले कांग्रेसलगायत दलसँगको गठबन्धन तोडेर एमालेसँग गठबन्धन गर्न पुगेका थिए ।
