दिपेन्द्र परियार, बागलुङ ।
अखिल नेपाल युवक संघले संघीयताविरुद्ध मोटरसाइकल र्याली सुरु गरेको छ । युवक संघको ४३ औँ स्थापना दिवसका अवसरमा बागलुङ जिल्लाका १० वटै पालिकामा पुग्नेगरी मोटरसाइकल मार्च सुरु गरिएको अध्यक्ष कृष्ण पाण्डेले जानकारी दिनुभयो ।
मार्चका क्रममा युवक संघले महंगी, भ्रष्टाचार र राष्ट्रघातविरुद्ध खबरदारी गरिरहेको छ ।
युवक संघको स्थापना दिवसका अवसरमा अन्य जिल्लामा पनि विभिन्न कार्यक्रम हुने उहाँले बताउनुभयो । अखिल नेपाल युवक संघले माघ २५ देखि २७ सम्म तीन दिन आफ्नो स्थापना दिवस मनाउने गर्दछ ।
बुधबार (माघ २४ गते) बरेङ बजारमा आयोजित समारोहमा केन्द्रीय अध्यक्ष पाण्डेले जिल्ला अध्यक्ष वीरेन्द्र थापालाई संघको झण्डा हस्तान्तरण गरेर कार्यक्रमको शुभारम्भ गर्नुभयो ।
त्यसक्रममा सम्बोधन गर्दै उहाँले देशलाई घाँडो बनेको संघीयता खारेज गर्न युवाहरू जुर्मुराउनु पर्ने बताउनुभयो । पाण्डेले देशमा ब्याप्त महंगी, अनियमितता, ढिलासुस्ती र भ्रष्टाचारको अन्त्यका लागि युवाहरूलाई एकजुट हुन आह्वान पनि गर्नुभयो ।
उद्घाटन पछि अघि बढेको मार्च बरेङको हुग्दिसिर हुँदै बरेङको वडा न ३ नयाँ बजारमा पुगेर कोण सभामा परिणत भएको थियो । सभालाई अखिल नेपाल जनजाती सम्मेलनका केन्द्रीय सदस्य प्रगति बुढाले सम्बोधन गर्नुभयो ।
मार्च टोली बरेङको धुल्लुवास्कोट लिउवा हुँदै जैमिनि नगरपालिका वडा न ९ पैयुथन्थाप पुगेको थियो । पैयुमा भएको कोणसभालाई अखिल नेपाल युवक संघका केन्द्रीय सदस्य बरुण पौडेलले सम्बोधन गर्नुभयो ।
पैयुथन्थापदेखि राङखानी हुँदै जैमिनि ४ सकुर्वामा पनि कोणसभा आयोजना गरियो । कोण सभालाई संघका केन्द्रीय सदस्य कमल पौडेलले सम्बोधन गर्नुभयो ।
बुधबार जैमिनी नगरपालिकाको बिनामारे पुगेको टोलीले आज (बिहीबार) जैमिनीको शेरामा कार्यक्रम गरेको छ । कार्यक्रमलाई राष्ट्रिय जनमोर्चाका केन्द्रीय सदस्य गौरिश्वर पाण्डेले सम्बोधन गर्नुभएको छ ।
टोलीले आज बागलुङ नगरपालिकाको लोकतान्त्रिक चोक र तंग्राममा कार्यक्रम गर्दै अघि बढ्ने संघले जनाएको छ । आज युवाहरुको बास काठेखोलामा हुने छ ।
नियमित रुपमा ५० वटा मोटरसाइकल र दैनिक थपिने करिब १०० वटा मोटरसाइकलको मार्च अघि बढिरहेको संघले जनाएको छ ।
कार्यक्रम माघ २८ गते निशिखोला पुगेर समापन हुनेछ।
यस्तो छ मोटरसाइकल र्यालीको रुट
