काठमाडौं । मिटरब्याज तथा लघुवित्त पीडितले मेची–महाकाली– काठमाडौँ पैदल यात्रा सुरु गरेका छन् । ‘मिटरब्याज तथा ठगीविरुद्ध किसान मजदुर संघर्ष समिति’ ले नेपालको पूर्वी नाका झापाको काँकडभिट्टा र पश्चिमी नाका कञ्चनपुरको गड्डाचौकीबाट एकसाथ काठमाडौँ पैदल यात्रा सुरु गरेको हो ।
मंगलबार बिहान सवा १० बजे सुरु भएको पैदल यात्रामा सहभागी दुवै टोली यही माघ २७ गते चितवनको नारायणगढमा भेट भएर काठमाडौँ प्रस्थान गर्ने कार्यक्रम छ।
मिटरब्याजसम्बन्धी कानुन संशोधन, मिटरब्याज छानबिनका लागि शक्तिशाली उच्च आयोग गठनसहितका ६ बुँदे माग राखेर काठमाडौँ पैदल यात्रा सुरु गरिएको संघर्ष समितिका अध्यक्ष अवधेश कुशवाहले बताए ।
कुशवाहाले सरकारले गठन गरेको अनुचित लेनदेन तथा मिटरब्याज जाँचबुझ आयोगले पीडितको पक्षमा काम नगरेको दाबी गर्दै सरकारले अल्मल्याउन खोजेको बताए ।
संघर्ष समितिका प्रवक्ता निर्ग नवीनले प्रहरी प्रशासन पीडककै पक्षमा लागेकाले पुनः संघर्षमा उत्रिनुपरेको बताए । अघिल्लो आन्दोलनबाट न्याय नपाएपछि दोस्रो पटक आन्दोलनमा उत्रिनु परेको उनको भनाई थियो ।
उनले मिटरब्याज र लघुवित्तको ऋणको दुस्चक्रबाट पीडितलाई मुक्त गर्न न्यायिक आयोग बन्नुपर्ने आफूहरुको मुख्य माग भएको बताए।
पूर्वी टोलीको नेतृत्व कुशवाहाले गरेका छन् भने पश्चिम टोलीको नेतृत्व संघर्ष समितिका प्रवक्ता निर्ग नविनले गरेका छन्।
पैदल यात्रामा सहभागीले सडकमै खाना बनाएर खाने र रात परेपछि सामूहिक रुपमा बास बस्ने गरेका छन्।
झापाबाट अघि बढेको टोलीमा ७० जना र कञ्चनपुरबाट अघि बढेको टोलीमा झण्डै ५० जनाको संख्यामा पीडितको सहभागिता छ। पैदल यात्रामा सहभागी अधिकांश महिला छन्।
