ढाका । बङ्गलादेशकी प्रधानमन्त्री शेख हसिनाको दलले संसद्मा तीनचौथाइ सिट जितेसँगै उनी पाँचौँपटक प्रधानमन्त्री बन्दै हुनुहुन्छ ।
निर्वाचन आयोगका सहसचिव मोनिरुज्जमान तालुकदरले भन्नुभयो– ‘अवामी लिगले जनवरी ७, २०२४ का दिन सम्पन्न निर्वाचन जितेको छ ।
प्रधानमन्त्री हसिनाको दल आवामी लिगले २२३ सिट जितेको छ । निर्वाचनमा ६१ स्वतन्त्र उम्मेदवार विजयी भएका छन् ।’
विजयी भएका सांसदमध्ये अधिकांश अवामी लिगसँग आबद्ध व्यक्ति भएको केही स्थानीय सञ्चारमाध्यमले जनाएका छन् ।
प्रधानमन्त्री शेख हसिनाको राजीनामा र कामचलाउ सरकारद्वारा निर्वाचन गर्न गरेको विपक्षी दलको मागलाई बेवास्ता गरेको र यस्तो अवस्थामा हुने निर्वाचन स्वतन्त्र तथा निष्पक्ष हुनेमा आशङ्का गर्दै पूर्वप्रधानमन्त्री खालिदा जिया नेतृत्वको प्रमुख विपक्षी दल बङ्गलादेश नेशनलिस्ट पार्टी (बिएनपी) सहितका केही दलले आइतबारको मतदान वहिष्कार गरेका थिए ।
मुख्य विपक्षी दल बिएनपीसहितका हसिनाको नेतृत्वप्रति असन्तुष्ट केही दलले निर्वाचन बहिष्कार गरेको र निर्वाचनमा रहेका अन्य विपक्षी दलको प्रभाव निकै कम रहेकाले हसिनाको पार्टी र साझेदारले थप सिट पनि जित्ने अनुमान गरिएको छ ।
बिएनपीले निर्वाचनलाई स्वाङको सङ्ज्ञा दिएको छ । बिएनपीका नेता र समर्थकको व्यापक गिरफ्तारीपछि आइतबार सम्पन्न निर्वाचनको परिणाम आएको छ ।
बङ्गलादेशको निर्वाचन आयोगले निर्वाचनमा झन्डै ४० प्रतिशत मत खसेको बताएको छ यद्यपि आलोचकले उक्त सङ्ख्या पनि बढाइचढाइ प्रस्तुत गरिएको हुन सक्ने आशङ्का व्यक्त गरेका छन् । सन् २०१८ मा सम्पन्न निर्वाचनमा ८० प्रतिशतभन्दा बढी मतदान भएको थियो ।
निर्वाचनको सम्पूर्ण परिणाम आइनसकेकोले निर्वाचन परिणामको औपचारिक घोषणा हुन बाँकी नै छ ।
शेख हसिना सन् १९९६ मा पहिलोपटक प्रधानमन्त्री बन्नुभएको थियो । त्यसपछि सन् २००९, २०१४ र २०१८ मा भएका निर्वाचनमा उहाँ प्रधानमन्त्रीका रूपमा क्रमश: दोस्रो, तेस्रो र चौँथोपटक निर्वाचित हुनुभएको थियो । (रासस/एएफपी)
