काठमाडौं । जापानको टोकियोस्थित हानेदा विमानस्थलमा जापान एअरलाइन्सको यात्रुवाहक विमान अवतरण गरेलगत्तै कोस्टगार्डको मालवाहक विमानसँग ठोक्कियो।
मंगलबार भएको यो घटनामा जापान तट रक्षक निकाय (कोस्ट गार्ड) को विमानमा रहेका पाँचजनाको मृत्यु भएको छ।
कोस्टगार्डको सो विमान सोमवारको भूकम्पका पीडितलाई सहायता सामग्री पुर्याउन नोतो प्रायद्वीपको निगाता विमानस्थलतर्फ जाने क्रममा रहेको जनाइएको छ।
त्यसअघि जापानको प्रसारक एनएचकेले देखाएको भिडिओ फुटेजमा जापान एअरलाइन्सको झ्याल र तलपट्टिबाट आएको देखिन्छ।
विमानबाट यात्रुहरू छिटोछिटो निस्किरहेको पनि देखिएको थियो।
घटनापछि विमानस्थलका सबै धावनमार्ग बन्द गरिएका छन्।
एनएचके र रोयटर्स समाचारसंस्थाले जापान एअरलाइन्सलाई उद्धृत गर्दै विमानमा सवार सबै ३७९ यात्रुको उद्धार गरिएको जनाएका छन्।
जापानी प्रसारक टीबीएस र एनएचकेका अनुसार ठोक्किएको तटरक्षक निकायको सानो विमानबाट एक व्यक्ति बाहिर निस्किन सफल भएका थिए। उनी गम्भीर घाइते रहेको बताइएको छ।
विमानस्थलको धावनमार्गमा समेत आगो देखिएको छ। दुई घण्टा भन्दा बढि समयसम्म जापान एअरलाइन्सको विमान र त्यसको भग्नावशेषमा आगो लागेको थियो ।
धावनमार्गमा आगो निभाउन अग्निनियन्त्रकहरू खटिएका थिए ।
एअरबस ए३५० जेट विमान उत्तरी जापानको होकाइदोबाट आएको जापान एअरलाइन्सका प्रवक्ताले बताएका छन्।
