काठमाडौँ । जिल्ला प्रशासन कार्यालय काठमाडौँले नागरिकता प्राप्तिका लागि आवश्यक प्रक्रिया पुर्याएर मात्रै सिफारिस गर्न वडा कार्यालयलाई परिपत्र गरेको छ ।
नेपाल नागरिकता (पहिलो संशोधन) ऐन–२०७९ गत जेठ १७ मा राजपत्रमा प्रकाशित भइसकेको सोही ऐन र नियमावलीबमोजिम प्रक्रिया पूरा गरेर मात्रै सिफारिस गर्न महानगरले अनुरोध गरेको हो ।
नागरिक अनुसूची मात्रै भरेर आउने गरेको र आवश्यक कागजात नहुँदा दु:ख पाउने अवस्था देखिएको भन्दै कार्यालयले सो परिपत्र गरेको छ ।
सहायक प्रमुख जिल्ला अधिकारीका खड्गबहादुर श्रेष्ठले भन्नुभयो– ‘नागरिकले आवश्यक सम्पूर्ण कागजपत्र नल्याउँदा दु:ख पाएका छन् । सबै कागजात पूरा गरी वडा सिफारिस भयो भने सजिलो हुन्छ ।’
कार्यालयले जन्मको आधारमा नागरिकता लिएकाको सन्तानलाई वंशजका आधारमा सिफारिस गर्दा बाबु र आमा नेपाली नागरिक भएको र निजको बसोबास निरन्तर नेपाल सरहदभित्र गरेको यकिन गर्न पनि भनेको छ ।
त्यसका लागि बाबुआमाको सक्कल नागरिकता, सक्कल जन्मदर्ता, जग्गाधनी प्रमाणपुर्जा (निवेदकको बाबुआमा नाम भएको ) शैक्षिक प्रमाणपत्र, घरधनी दर्ता प्रमाणपुर्जा, बसाइँसराइ दर्ता प्रमाणपत्र (ठेगाना परिवर्तन गर्न चाहेमा), स्थायी बसोबास प्रमाणपत्र, बाबुआमाको विवाहदर्ता र पारिवारिक विवरण, बाबुआमाको मृत्यु भएको भए मृत्यु दर्ता प्रमाणपत्र, २०६३ को टोलीले नाबालक दर्ता गरेको भए सोको निस्सासमेत संलग्न गराउन उल्लेख गरिएको छ ।
परिपत्रमा कार्यालयबाट आवश्यताअनुसार स्थलगत प्रहरी सर्जमिन मुचुल्कासमेत गरिने हुँदा सो बेहोरालाई पुष्टि गर्ने अन्य कागजात पनि समावेश गर्न परिपत्रमा उल्लेख छ ।
