टङ्क गौतम, केन्द्रीय सल्लाहकार, राष्ट्रिय जनमोर्चा
० आजभोलि के गरिरहनुभएको छ ?
– सामान्य जीवन बिताइरहेको छु ।
० राजनीतितर्फ कसरी आकर्षित हुनुभयो ?
– तत्कालीन व्यवस्थाबाट जनतामाथि भएको अन्याय–अत्याचारको अन्त्यका लागि राजनीतिप्रति आकर्षण पैदा भएको हो ।
० नेकपा (मसाल) को राजनीति किन मन पराउनुभयो ?
– देशमा भएका अन्य कम्युनिस्ट पार्टीभन्दा नेकपा (मसाल) ले लिएको रणनीति र कार्यनीति सही लागेकोले क. मोहनविक्रम सिंहले नेतृत्व गरेको पार्टी मन पराएर लागेको छु ।
० अहिलेसम्म के कस्ता जिम्मेवारी वहन गरिसक्ननु भएको छ ?
– पार्टीसदस्यको हैैसियतले पार्टी र राष्ट्रिय जनमोर्चालाई जनतासामु परिचित गराउने काममा निरन्तर लागेको छु
० देशको अहिलेको राजनीतिक अवस्थालाई कसरी बुझ्नुभएको छ ?
– देशमा गणतन्त्रको स्थापना भएको भनिएता पनि अझसम्म अर्धसामन्ती तथा अर्धऔपनिवेशिक सोच र व्यवहारको अन्त्य भई नसकेकाले त्यसमा परिवर्तनका लागि आन्दोलनको अझै आवश्यकता रहेको देखिन्छ ।
० कोशी. प्रदेशमा राष्ट्रिय जनमोर्चाको सङ्गठनात्मक अवस्था र भूमिका कस्तो छ ?
– कोशी प्रदेशमा हाम्रो पार्टीको सङ्गठनात्मक अवस्था तुलनात्मक रूपमा कमजोर छ । केही जिल्ला र स्थानीय स्तरमा राष्ट्रिय जनमोर्चाका कमिटीहरू कृयाशील छन् ।
० देशको वर्तमान अवस्थामा सुधारका लागि के कस्ता काम गरिनुपर्दछ भन्ने लाग्दछ ?
– संविधानबमोजिमका कानुन निर्माण गरी सोको जनमुखी र पारदर्शी रूपमा कार्यान्वयन गर्नुपर्ने देखिन्छ । त्यसो गर्दा केही राम्रो व्यवस्था हुन सक्दछ तर त्यतिले मात्र जनताको जीवनमा आमूल परिवर्तन हुन सक्दैन । त्यसका लािग सर्वहारा राज्यक्रान्ति नै हुनुपर्ने आवश्यकता छ । नयाँ जनवादी क्रान्ति सम्पन्न भएपछि मात्र देशमा जनताका समस्याको समाधानको दिशामा ठोस कदम उठाउन सकिने छ ।
० सङ्घीयता तपाईंहरूलाई किन बेठिक लागेको हो ?
– सङ्घीयता नेपाली जनताको इच्छा र आवश्यकताभन्दा पनि बैदेसिक हस्तक्षेपका कारण नेपालमा लादिएको हो । हाम्रो जस्तो अल्पविकसित देशले सङ्घीयता धान्न सक्दैन भन्ने लागेर मलाई मात्रै होइन, सम्पूर्ण नेपाली जनतालाई मन नपरेको हो ।
० राजनीतिमा नया“ पि“ढीलाई व्यापक सङ्ख्यामा प्रवेश होस् भन्नका लागि के गर्नुपर्ला ? यसबारे तपाईको विचार के छ ?
– पार्टीका नीति, विचार र कार्यक्रमहरूको बारेमा नयाँ पुस्ताका युवालाई व्यवस्थित रूपमा प्रशिक्षण कार्यक्रम सञ्चालन गर्ने र प्रशिक्षित व्यक्तिहरूमध्येबाट पार्टीका विभिन्न कमिटिमा उनीहरूलाई आबद्ध गरी पार्टीको कामलाई सक्रिय रूपमा अगाडि बढाउनु आवश्यक छ ।
० अन्तमा युगदर्शनको मार्फत भन्नुपर्ने केही छ कि ?
– पार्टी सञ्चालनका लागि मानव संसाधन व्यवस्थापन नै मुख्य कुरा हो । उचित व्यक्तिलाई जिम्मेवारी दिने र कार्यसम्पादनको आधारमा नेता–कार्यकर्तालाई पुरस्कार र दण्डको व्यवस्था गर्न सके पार्टीप्रतिको जनताको समेत आकर्षण बढ्ने हुँदा सोहीबमोजिम गर्नुपर्ने देखिन्छ । त्यस क्रममा देशमा देखा परेका विकृति–विसङ्गतिका विरुद्ध जनतालाई सुसूचित र एकाकार गर्दै जानु आवश्यक छ ।
अन्तमा, आफूलाई लागेका कुराहरू व्यक्त गर्ने मौका दिने युगदर्शन साप्ताहिकलाई धन्यवाद दिन चाहन्छु ।
प्रस्तुति : प्रकाश थापामगर
