काठमाडौं । नागरिक अगुवाहरुले मिटरब्याज पीडितहरुमा प्रहरीले दमन गरेको भन्दै खबरदारी गरेका छन् ।
बुधवार काठमाडौंको रत्नपार्कस्थित शान्तिबाटिकामा नागरिक अगुवाहरुको टोलीले मिटरब्याज पीडितहरुमाथि प्रहरीले दमन गरेको भन्दै खबरदारी गरेका हुन् ।
प्रदर्शनमा देशका विभिन्न स्थानहरुबाट आएका मिटरब्याज पीडितहरु पनि प्ले कार्ड बोकेर बिरोधमा उत्रिएका थिए । उनीहरुले उपप्रधान एवं गृहमन्त्री नारायणकाजी श्रेष्ठको राजीनामा माग समेत गरेका छन् ।
उनीहरुले मन्त्रीज्यु कान जँचाउ, आँखा जँचाउ, सबै ठिक भए दिमाग जँचाउ, प्रहरी मेरो साथी द्वन्द्व नछेडाउ, सुद्खोरलाई देखाउने लाठी हामीलाई नदेखाउ, जनवादी गृहमन्त्री कहाँ गए, साहुको धोती मुनि हराए लगायतका प्लेकार्ड बोकेर बिरोध प्रदर्शन गरेका थिए ।
यसअघि पनि मिटरब्याज पीडितहरुले सरकारले आफ्ना माग पूरा नगरेको भन्दै आन्दोलन गर्दै आइरहेका छन् ।
सोमबार रत्नपार्कमा भेला भएका मिटरब्याज पीडितमाथि प्रहरीले अन्धाधुन्ध लाठी प्रहार गरेको थियो । विभिन्न जिल्लाबाट राजधानी आएका मिटरब्याज पीडितले दैनिक प्रदर्शन गरिरहेका छन् ।
