गुल्मी । राष्ट्रिय जनमोर्चाका महासचिव मनोज भट्टले राजतन्त्र फर्काउन पूर्वराजा ज्ञानेन्द्र शाह सडकमै निस्किएको बताउनुभएको छ ।
अहिलेसम्म पूर्वराजा गणतन्त्रका विरुद्ध रहेपनि सडकमा उत्रेका थिएनन् भन्दै भट्टले एमालेका नेता दुर्गा प्रसाईंको अगुवाइमा चलेका गणतन्त्र विरोधी अभियानमा झापाबाट खुलारुपमा सडकमा निस्किएको बताउनुभयो ।
बुधबार तम्घासमा राजमो गुल्मीले आयोजना गरेको विरोध सभामा महासचिव भट्टले देशी विदेशी शक्तिहरुसँग सल्लाह गरेर नै राजावादीहरु खुल्ला रुपमा आएको भन्दै यसले गणतन्त्र थप खतरामा परेको धारणा राख्नुभयो ।
‘गणतन्त्रको विरुद्धमा सुरुदेखि नै राजावादी शक्तिहरु छँदै थिए, तिनीहरुसँग एमाले पनि प्रत्यक्ष वा अप्रत्यक्षरुपमा साँठगाँठ गरेको छ’ भट्टले भन्नुभयो, ‘अहिले संसदमा राजावादीहरूको उपस्थिति एमालेकै कारण भएको हो । त्यसकारण अहिले गणतन्त्र, राष्ट्रियता र धर्मनिरपेक्षता खतरामा परेको छ ।’
भट्टले एमाले राज्यका प्रमुख पदमा कब्जा गरेर देशमा अधिनायकवादी शाशनको अभ्यास गर्नका लागि नै राष्ट्रपतिमा एमालेका उम्मेदवार बनाउन माओवादीसहितका दललाई दबाब दिइरहेको बताउनुभयो ।
कार्यक्रममा लुम्बिनी प्रदेश सांसद तथा राजमो केन्द्रीय सदस्य तारा थापा क्षत्री, केन्द्रीय सदस्य रामकुमार क्षत्री, नेकपा (मसाल) का जिल्ला प्रवक्ता ओमेद्र कुँवर, प्रगतिशील पत्रकार संघका जिल्ला अध्यक्ष तथा केन्द्रीय सदस्य हरि न्यौपाने र अखिल नेपाल महिला संघकी नरमाया रानाले सम्बोधन गर्नु भएको थियो ।
राजमो पार्टी कार्यालय मसाल बजारबाट निस्केको जुलुस विभिन्न नारासहित तम्घास हुँदै सहिद चोकमा पुगेर विरोध सभामा परिणत भएको थियो ।
राष्ट्रिय जनमोर्चाका जिल्ला अध्यक्ष जीवन रानाको अध्यक्षता र सचिव छविलाल सर्तुङ्गीको सञ्चालनमा अघि बढेको विरोध सभामा स्वागत जिल्ला कोषाध्यक्ष टेकबहादुर केसीले गर्नुभएको थियो ।
राष्ट्रिय जनमोर्चाले संघीयता खारेजीसहित विभिन्न माग राखेर देशका विभिन्न जिल्लामा विरोध प्रदर्शनलगायतका कार्यक्रम गर्दै आइरहेको छ ।
