किभ । गत नौ महिनादेखि रुसी आक्रमण झेलिरहेका युक्रेनी नागरिकको जीवन कष्टकर बन्दै गइरहेको छ । त्यस क्रममा राजधानी किभका बासिन्दा बिहीबार पिउने पानी र प्रकाशको अभावमा छटपटाइरहेको देखिन्थ्यो ।

अघिल्लो दिन रुसी बम आक्रमणमा पानी र बिजुली आपूर्तिका स्रोत तहसनहस भएपछि प्रकाश, पानी र न्यानोको खोजीमा किभका जनता हातमा खाली बोतल बोकेर अँध्यारोमा सहरका चमेनागृहतर्फ लागेका थिए । बत्तीको सामान्य व्यवस्था भएका ती चमेनागृहमा ठुलो भिड लागेको थियो । बिहीबार रातिको दृश्य हेर्दा युक्रेनी नागरिक युद्धलाई बेवास्ता गर्दै जीवन जिउने जमर्कोमा लागेका प्रतीत हुन्थ्यो ।

३० लाख नागरिकको बसोबास रहेको राजधानी सहर किभमा पिउने पानीको अभाव भएपछि सर्वसाधारणले वर्षाको पानी बग्ने ड्रेनपाइपबाट जल सङ्कलन गरिरहेका थिए । पानी आपूर्तिको व्यवस्था मिलाउन मर्मत गर्ने टोली अथक परिश्रममा जुटेको थियो यद्यपि धारामा पानी प्रवाह भइसकेको थिएन ।

पिउने पानी नपाएर आकुलव्याकुल बनेका नगरबासी आफ्ना साथी, परिचित तथा परिजन कसको घरमा बिजुली छ ? कसको घरमा पानी छ भनेर मोबाइल फोनमा सन्देश आदानप्रदान गरिरहेका थिए । कुनै घरमा पानी भए बत्ती थिएन, बत्ती भए पानी । नगरमा अघिल्लो दिन गरिएको भिषण हवाई आक्रमणले अकल्पनीय परिस्थितिको सामना गर्न उनीहरू बाध्य भएका थिए यद्यपि किभका केही स्थानमा सञ्चालन भएका चमेनागृहले उनीहरूलाई राहत दिएको थियो ।

४९ वर्षीय ब्याङ्कर ओलेक्सी रस्चुपकिन तेस्रो तलाको आफ्नो फ्ल्याटमा पानी आएको थाहा पाएपछि ब्युझिए तर उनको रेफ्रिजेरेटरबाट बगेको पानीले कोठा पोखरीमा परिणत भएको थियो ।

बिजुली आपूर्ति नहुँदा उदास भएका उनी ट्याक्सी चढेर निपर नदीपारिको क्पाफेमा पुगे, जहाँ तातो खाना, तातो पेय र वाइफाईसहितको सेवा प्रवाह भइरहेको थियो । रुसी आक्रमणबाट क्याफेमा कुनै प्रभाव नपरेकाले उनको असहज परिस्थिति केही सहज भयो ।
‘म यहाँ छु किनभने यहाँ तातो कफी पाइन्छ, उज्यालो पनि छ, अनि यहाँ जीवन छ‘ एक जना पीडितले भने ।

किभ नगरका प्रमुख भिटाली क्लित्सकोले बिहीबार बिहानसम्म सहरका ७० प्रतिशत क्षेत्रमा बिजुली आपूर्ति पुन:स्थापना गरिएको बताए । रुसी आक्रमणमा परी चार जनाले ज्यान गुमाएको बताउँदै उनले क्षेप्यास्त्र आक्रमणमा परी एक जना महिलाको पनि मृत्यु भएको जानकारी दिए ।

हिमपातपछिको वर्षाले कठाङ्ग्र्रिएको किभको जनजीवन पुन: पुरानै अवस्थामा फर्कने अपेक्षा गरिएको छ । (रासस/एपी)