किभ । रुसले युद्धलाई तीव्र गतिमा अघि बढाउने क्रममा युक्रेनलाई बिजुलीपानीबाट वञ्चि बनाउने रणनीति अपनाएको छ ।
निरन्तर क्षेप्यास्त्र आक्रमणबाट उत्तरपूर्वी सहर खार्किभ र चेर्कसीका आधारभूत भौतिक पूर्वाधारमा क्षति हुँदा ८० प्रतिशतभन्दा बढी किभका जनता अक्टोबर ३१, २०२२ देखि बिजुली र पानीबाट वञ्चित हुनुपरेको छ ।
रुसी आक्रमणका कारण देशका धेरै स्थानमा नागरिक प्रभावित भएका तथा सोमबार किभको ८० प्रतिशतभन्दा बढी जनसङ्ख्याले पानीबिजुली कटौतिको सामना गर्नुपरेको युक्रेनी अधिकारीले बताएका छन् ।
किभ नगरका प्रमुखले युद्धको चपेटामा परेको देशको परिस्थितिलाई दृष्टिगत गरी आफूलाई आवश्यक पर्ने पानीको भण्डारण एवम् व्यवस्थापन गर्न नगरवासीलाई आग्रह गरेका छन् । किभका अग्ला आवासीय भवनमा पानी आपूर्तिमा कठिनाइ भएको छ ।
ब्ल्याक सीमा ड्रोन हमला गरेको बदलामा रुसले युक्रेनी पूर्वाधारलाई आक्रमण निशाना बनाएको हो । ब्ल्याक सी हमलालाई लिएर क्रेमलिनले युक्रेनको बन्दरगाहबाट अन्नले भरिएका एक सय ७६ ओटा जहाजलाई गन्तव्यतर्फ जान दिएको छैन । उसले युक्रेनमा मात्र नभई विश्वभर खाद्यसङ्कटको जोखिम बढाएको छ ।
संयुक्त राष्ट्र सङ्घसँगको मध्यस्थतामा गरिएको अन्नआपूर्तिको सम्झौता रुसले अस्वीकार गरेपछि त्यसको विश्वव्यापी रूपमा आलोचना भएको छ । अमेरिकी राष्ट्रपति जो बाइडेनले युक्रेनी अन्न बोक्ने जहाजलाई सुरक्षित मार्ग नदिएकोमा आपत्ति जनाउँदै त्यसलाई क्रेमलिनको अर्थहीन एवम् अपमानजनक कदम भन्नुभएको छ ।
युरोपेली सङ्घका विदेशनीति प्रमुख जोसेप बोरेलले निर्णय फिर्ता लिन आग्रह गरेका छन् भने संयुक्त राष्ट्र सङ्घका महासचिवका प्रवक्ता स्टेफेन डुजारिकले राष्ट्र सङ्घ रुसी अधिकारीसँग सम्पर्कमा रहेको बताएका छन् । उनले अन्न आपूर्तिका प्रयासमा कुनै पनि पक्षबाट बाधा पुर्याउन नहुनेमा जोड दिएका छन् । (रासस/एएनआई)
