सोल । उत्तर कोरियाले आइतबार ज्वरोबाट थप १५ जनाको मृत्यु भएको घोषणा गरेको छ । उनीहरूलाई कोभिड भएको आशङ्का पनि गरिएको छ ।
सो देशको आधिकारिक समाचार समिति केसिएनएले आइतबार प्रकोप सुरु भएदेखि ४२ जनाको मृत्यु भएको बताएको छ, जसमा आठ लाख २० हजार ६२० ज्वरो देखिएको तीमध्ये तीन लाख २४ हजार ५५० चिकित्सा उपचार प्राप्त गरेपछि निको भएको बताइएको छ । यहाँ कोभिड–१९ को पहिलो घटना पुष्टि भएलगत्तै नेता किम जोङ उनले राष्ट्रव्यापी रूपमा लकडाउन गर्न आदेश दिनुभएको छ ।
उत्तर कोरियामा कोभिड विरुद्धको खोप लगाइएको छैन । यहाँ खोप नलगाएका मानिस रहेकाले ज्वरोले थलिएका भनिएका यी मानिसमा पनि कोभिडको सङ्क्रमण भएको हुन सक्ने आशङ्का गरिएको छ । उत्तर कोरियाको राजधानी प्योङयाङमा अत्यधिक सङ्क्रामक ओमिक्रोन भेरियन्ट पत्ता लागेका गत बिहीबार पुष्टि भएको थियो ।
कोभिडको नियन्त्रणका लागि कडा मापदण्ड
यसैमाझ, उत्तर कोरियाले कोभिड–१९ को सङ्क्रमणबाट नियन्त्रणका लागि निकै कडा मापदण्ड लागु गरेको छ । सो मापदण्डानुसार यहाँ देशव्यापी रूपमा लकडाउन गरिएको छ । यहाँका नागरिकलाई घरबाट बाहिर निस्किन दिइएको छैन । तर पछिल्ला केही दिनयता ज्वरोका बिरामी बढेकाले उनीहरूको उपचारमा भने स्वास्थ्यकर्मीहरू परिचालन गरिएको बताइएको छ ।
यहाँ शनिबार ज्वरोबाट थप २१ जनाको मृत्यु भएको बताइएको थियो । उत्तर कोरियामा पछिल्ला केही दिनमा ज्वरोको बिरामी बढेको पाइएको छ । ती ज्वरोका विरामीमा कोभिड भएको आशङ्का पनि गरिएको छ । यहाँ कोभिड–१९ को पहिलो घटना पुष्टि भएको दुई दिनपछि देशव्यापी रूपमा पाँच लाखभन्दा बढी मानिस बिरामी परेको बताएको छ ।
उत्तर कोरियाली जनस्वस्थ्य मन्त्रालयको संयोजनमा ती ज्वरोका बिरामीको उपचार सुरु भएको छ । यहाँ ज्वरो आउने बिरामीको सङ्ख्या बढ्दै गएको पनि बताइएको छ । ती ज्वरोका बिरामीमा कोभिडको सङ्क्रमण भएको आशङ्का गरिएकाले उपचारमा पनि सतर्कता अपनाइएको बताइएको छ ।
उत्तर कोरियाको राजधानीमा अत्यधिक सङ्क्रामक ओमिक्रोन भेरियन्ट पत्ता लागेका बिहीबार पुष्टि भएको थियो । त्यहाँ नेता किम जोङ उनले राष्ट्रव्यापी रूपमा लकडाउन गर्न आदेश दिएअनुसार देशव्यापी रूपमा लकडाउन भइरहेको बताइएको छ । (रासस/एएफपी)
