पोखरा । गण्डकी प्रदेशमा राष्ट्रिय सभा निर्वाचनमा भएको ‘भोट क्रस’ बारे पाँच दलीय गठबन्धनले छानबिन गर्ने भएको छ । बिहीबार बसेको पाँच दलको बैठकले गठबन्धनभित्र कमजोरी भएको निष्कर्षसहित छानबिन गर्ने निर्णय गरेको हो ।
निर्वाचन भएपछिको समीक्षा बैठकमा मुख्यमन्त्री कृष्णचन्द्र नेपाली, नेपाली कांग्रेस गण्डकी सभापति शुक्रराज शर्मा, माओवादी केन्द्रकी गण्डकी अध्यक्ष गायत्री गुरुङ, नेकपा एकीकृत समाजवादीका पोलिटब्यूरो सदस्य प्रतापलाल श्रेष्ठ, राष्ट्रिय जनमोर्चाका गण्डकी अध्यक्ष शंकर बराल र जनता समाजवादी पार्टीका गण्डकी उपाध्यक्ष हेमबहादुर थापाउपस्थित हुनुहुन्थ्यो ।
बैठकपछि जारी विज्ञप्तिमा भनिएको छ, ‘हाम्रो पक्षमा गम्भीर कमी–कमजोरी रहन गएको हुँदा आ–आफ्नो पार्टीमा छलफल गरी यसलाई अनुशासनको विषयवस्तु बनाउने पनि निर्णय गर्यो ।’
राष्ट्रिय सभा निर्वाचनमा गण्डकीबाट गठबन्धनका तीनै जना उम्मेदवार विजयी बनेका थिए । महिलातर्फ कांग्रेसकी कमला पन्त, दलिततर्फ माओवादी केन्द्रका भुवनबहादुर सुनार र खुलातर्फ माओवादीकै सुरेश आले मगर विजयी बनेका हुन् ।
पाँच दलीय गठबन्धनका उम्मेदवार विजयी भएपनि गण्डकीमा प्रदेश सांसद र स्थानीय तहका प्रमुख उपप्रमुख दुर्व तर्फ मत क्रस भएको परिणामले देखाएको छ ।
गण्डकी प्रदेशमा एमालेका २७ जना सांसद छन् । भोट क्रस नभएको भए एमाले उम्मेदवारहरुलाई सांसदतर्फ ४८ मतभार रहेको २७ मतमात्रै आउनुपर्ने हो । तर, एमालेतर्फबाट महिला उम्मेदवार लीला पोखरेल धनेतले र अर्जुनकुमार सुनामले २९/२९ मत ल्याए भने खुलातर्फका पुण्य पौडेलले पनि २८ मत प्राप्त गरे।
यस्तै, एमालेसँग स्थानीय तहमा ६९ मत थियो। १८ मतभार हुने सो क्लष्टरमा पनि पुण्य पौडेलले ७५ तथा लीला र अर्जुनले ७४/७४ मत पाए। यसको मतलब ५ जना गठबन्धनको मत एमालेलाई गयो।
मत क्रस भएको विषयलाई गम्भीरतापूर्वक लिँदै दलहरुले त्यसको छानबिन गर्ने बताएका हुन् । यस्तै, गठबन्धनलाई निरन्तरता दिनुपर्ने निष्कर्ष पनि बैठकले निकालेको छ ।
