काठमाडौं । पूर्वसभामुख कृष्णबहादुर महराले अमेरिकासँग गरिएको मिलेनियम च्यालेन्ज कर्पोरेसन (एमसीसी) सम्झौता राम्रोसँग अध्ययन गर्न प्रधानमन्त्री शेरबहादुर देउवालाई सुझाव दिनुभएको छ । एक अनलाइन टेलिभिजनलाई अन्तर्वार्ता दिँदै माओवादी केन्द्रका नेता महराले एमसीसी सम्झौता नपढेको बताउनुभएको छ ।

गएको पुस ११ माओवादी केन्द्रको आठौं महाधिवेशन उद्घाटनका अवसरमा शुभकामना दिने क्रममा प्रधानमन्त्री देउवाले एमसीसी कहाँ छ राष्ट्रघाती भन्दै पहिला राम्रोसँग पढ्न आग्रह गर्नुभएको थियो । प्रधानमन्त्री देउवालाई जवाफ दिँदै महराले देउवाले नै एमसीसी नपढेको र पहिला आफैँले पढ्नुपर्ने बताउनुभएको हो ।

‘मलाई फेरि उहाँ (प्रधानमन्त्री)ले चाहिँ एमसीसी पढ्नु भएनजस्तो लाग्छ। म प्रधानमन्त्री शेरबहादुर देउवालाई फेरि एकपटक गहिरिएर पढ्न सुझाव दिन चाहन्छु’ महराले भन्नुभयो, ‘पूर्वसभामुखको हैसियतले म उहाँलाई अनुरोध गर्न चाहन्छु–गहिरिएर पढ्नुहोस्। पढ्ने मात्र होइन, अन्तर्राष्ट्रिय सन्दर्भ पनि हेर्नुहोस्। तब छर्लङ्ग बुझिन्छ। अरु सबै कुरा त भन्नु परेन।’

यस्तै, सञ्चारकर्मीले सोधेको प्रचण्डले एमसीसीलाई संसदको विषय नबनाई मन्त्रिपरिषदबाट निर्णय गरेर जान सकिने बताउनुभएको हो ? भन्ने प्रश्नको जवाफमा महराले एमसीसी संसदमा आउनु नै रहश्यमय भएको बताउनुभयो ।

उहाँले प्रश्न गर्नुभयो, ‘मन्त्रिपरिषद्ले उहिल्यै पास गरिसक्यो। अर्थ मन्त्रालय र अर्थमन्त्री ज्ञानेन्द्रबहादुर कार्कीले सही नै गरिसक्नुभएको छ, त्यो पाटो सकिइसक्यो। अब फेरि संसदमा आउनुपर्ने कारण किन ? त्यो संसदको विषय नै बन्न जरुरी थिएन। त्यही रहस्यमय छ। मैले पढ्नुस्, अध्ययन गर्नुस् भनेर प्रधानमन्त्रीलाई भनेको त्यही कारण हो। अब त्यसको धेरै पाटा पक्ष छन्, मैले अहिले व्याख्या गरिनँ। ज्ञानेन्द्रबहादुर कार्कीले अर्थमन्त्री हुँदा सही गरिसक्नुभयो, सरकारको तर्फबाट काम सकियो। अब फेरि किन संसदको विषय बन्छ त ?’

उहाँले एमसीसीलाई हल्काफुल्का रुपमा नलिन पनि चेतावनी दिनुभएको छ । एमसीसीसँग पैसा मात्रै नआएर अरु धेरै कुरा आएको महराको तर्क छ ।

‘अहिले परिमार्जन गर्ने भनेको त यो सम्झौता हो। सम्झौता भन्दा पर अरु धेरै सम्झौता भएका हल्ला पनि छन्, हल्लाको पछि नलागौं। मुख्यकुरा एमसीसी बाहिर चर्चामा आएजस्तो त्यसै आएको पैसा लिने भन्ने मात्रै होइन। यसलाई हल्काफुल्का भरमा लिनु हुँदैन’ उहाँले भन्नुभयो, ‘पैसाको विषय मात्र होइन। अरु धेरै विषय छन्। त्यसबारेमा गहिरो अध्ययन यसबीचमा गर्न जरुरी छ। सबैलाई अध्ययन गर्न म अनुरोध गर्छु ।’

नेता महराले एमाले र कांग्रेस मिले पनि एमसीसी पास नहुने दाबी गर्नुभयो । एमसीसीकै कारण पाँच दलीय गठबन्धन नटुट्ने पनि स्पष्ट गर्नुभयो । ‘यदि एमाले–कांग्रेस मिले भने यो एमसीसी ल्याउने होइन, गठबन्धन टुटाउने उद्देश्य हो भन्ने देखिन्छ। तर यो गठबन्धन कुनै हालतमा टुट्दैन’ महराले भन्नुभयो ।