नवलपुर । राष्ट्रिय जनमोर्चाका अध्यक्ष चित्रबहादुर केसीले पार्टीबाट केही व्यक्ति चोइटिएर जाँदैमा पार्टीलाई केही फरक नपर्ने बताउनुभएको छ । शुक्रबार राष्ट्रिय जनमोर्चा, नवलपुरले आयोजना गरेको प्रशिक्षणात्मक भेलालाई सम्बोधन गर्दै अध्यक्ष केसीले पार्टीबाट चोइटिएर जानेहरुले पार्टीलाई ‘दक्षिणपन्थी भएको’ बासी आरोप दोहोर्याएको बताउनुभयो ।

नेकपा (मासाल) र राष्ट्रिय जनमोर्चालाई सिंगो रुखको संज्ञा दिँदै केसीले फुटेर जानेहरु सामान्य चोइटो भएको बताउनुभयो । सानातिना चोइटा झर्दैमा रुख नसुक्ने उहाँको टिप्पणी थियो ।

‘सानातिना चोइटा झर्दैमा रुख सुक्दैन । जरा बलिया छन् भने पात झरेर केही हुँदैन । फेरि पलाउँछ’ केसीले भन्नुभयो, ‘रुखको जरा भनेको पार्टीको नीति, सिद्धान्त र विचार हो । कार्यकर्ताले अहिलेसम्म विचारको रक्षा गरेरै पार्टी जोगाएका छन् ।’

अध्यक्ष केसीले पार्टी जीवनमा बेला मौकामा यस्ता चोइटाहरु स्वार्थवस फुटेर जाने गरेको स्मरण गर्दै अहिलेका फुटपरस्तहरु पनि कुनै न कुनै स्वार्थ समूहमा गएर टाँसिने टिप्पणी गर्नुभयो । पार्टीमाथि हुने सबै खाले आक्रमणविरुद्ध कार्यकर्ताहरु एक जुट हुनुपर्नेमा पनि उहाँको जोड थियो ।

अध्यक्ष केसीले राजनीतिक दलहरुले दलाल पुँजीवादको सेवा गर्ने गरेको आरोप पनि लगाउनुभयो । तर, राष्ट्रिय जनमोर्चाले जनता र आफ्नै तागतमा देशको सार्वभौमिकता, अखण्डता र जनतन्त्रको लागि निरन्तर संघर्ष गरिरहेको उल्लेख गर्नुभयो ।

‘हामीले गर्ने संघर्ष आफ्नै मुक्तिको लागि पनि हो’ केसीले थप्नुभयो, ‘देशको भविष्य र सही व्यवस्था ल्याउन निरन्तर संघर्ष गर्नुपर्छ ।’
अध्यक्ष केसीले पाँच दलीय गठबन्धनले केपी ओलीको प्रतिगामी उद्देश्यलाई पराजित गरेको बताउनुभयो । तर, तत्कालका लागि

प्रतिगमन पराजित भएपनि देशको राजनीति स्थिर नरहेको उहाँको भनाई थियो । केसीले एमसीसी कुनै पनि हालतमा पास हुन नहुनेमा जोड दिनुभयो । यस्तै, संघीय प्रणाली अफापसिद्ध भइसकेको भन्दै उहाँले संघीयताविरुद्धको आन्दोलनलाई पनि अझ चर्काएर लैजानुपर्ने बताउनुभयो ।

राजमो नवलपुरका अध्यक्ष दीपक पाण्डेको अध्यक्षतामा सम्पन्न भेलामा राजमोका पूर्वकेन्द्रीय उपाध्यक्ष बद्रे आलम र पूर्वकेन्द्रीय सचिव कृष्ण अधिकारीले विभिन्न विषयमा प्रशिक्षण दिनुभएको थियो । कार्यक्रमको सञ्चालन कृष्ण सापकोटा र स्वागत लालु खरेलले गर्नुभएको थियो ।

भेलामा राजमो नेता कार्यकर्ताको उत्साहजनक सहभागिता रहेको थियो । भेलामा सहभागि नेता कार्यकर्ताले फुटपरस्त तत्वको भ्रमविरुद्ध एकताबद्ध हुनुपर्ने बताएका थिए ।