बुटवल । राष्ट्रिय जनमोर्चाका अध्यक्ष चित्रबहादुर केसीले वामपन्थी सङ्कीर्णतावादलाई चिन्न गाह्रो रहेको बताउनुभएको छ ।
बुटवल २०७८ असोज २२ गतेदेखि सुरु भएको अखिल नेपाल राष्ट्रिय स्वतन्त्र विद्यार्थी युनियन (छैठौं) को बाइसौँ राष्ट्रिय सम्मेलनमा प्रमुख अतिथिको आसनबाट मन्तव्य राख्दै उहाँले यस्तो अभिव्यक्ति दिनुभएको हो ।
‘दक्षिणपन्थी अवसरवादलाई चिन्न सजिलो छ, त्यसैगरी उग्रवामपन्थी भड्कावलाई चिन्न सजिलो छ’ उहाँले अगाडि भन्नुभयो– ‘तर वामपन्थी सङ्कीर्णतावादलाई चिन्न गाह्रो छ ।’
उहाँले दक्षिणपन्थी अवसरवाद रुस, चीन र स्वयम् नेपालको इतिहासबाट सजिलै चिन्न सकिएको बताउनुभयो ।
उग्रवामपन्थी भड्कावलाई पनि सजिलै चिन्न सकिने बताउँदै उहाँले नेपालमा दुई दुई पटक त्यसको उदाहरण देखिसकिएको बताउनुभयो ।
सम्बोधनको क्रममा उहाँले वामपन्थी सङ्कीर्णतावादीमा ठुला कुरा मात्र गर्ने प्रवृत्ति रहेको बताउनुभयो ।
‘वामपन्थी सङ्कीर्णतावादीहरू सानातिना कुरा गर्दैनन्’ अध्यक्ष केसीले भन्नुभयो– ‘उनीहरू सुधारका लागि हुने आन्दोलनलाई महात्त्वहीन ठान्दछन् ।’
उहाँले भन्नुभयो– ‘उनीहरू समाजवाद र साम्यवादको कुरा गर्दछन्, तर तात्कालिक राजनीतिबारे उनीहरूसित ठोस नीति हुन्न ।’
‘हाम्रो पार्टीभित्रका रोइलो पनि त्यही हो’ उहाँले वामपन्थी सङ्कीर्णतावादी चिन्तनको प्रभाव राजमोमा पनि परेको बताउनुभयो ।
‘पार्टीको नीति मान्नुनपर्ने, पार्टीको अनुशासन मान्नुनपर्ने, पार्टीमा सक्रिय हुनुनपर्ने’ उहाँले प्रश्न गर्नुभयो– ‘तर जसले गुटबन्दी गर्छ, अराजकता फैलाउँछ, यस्तालाई पार्टीभित्र कसरी राख्ने ?’
अध्यक्ष केसीले भन्नुभयो– ‘हामीलाई पार्टीमा नेता–कार्यकर्ता थोरै भएर हो र कारबाही गरेको ? अनुशासनविहीन र फुटपरस्त काम गरेकाले निकाल्नुपर्ने बाध्यता आएकाले हो ।’
सम्बोधनको क्रममा जस्तो पायो, त्यस्तै व्यक्तिलाई पार्टीभित्र राख्दा प्रचण्ड, माधव नेपाल, केपी ओली र काङ्ग्रेस जस्तै स्थिति उत्पन्न हुने बताउनुभयो ।
