काठमाडौं । प्रधानमन्त्री शेरबहादुर देउवा नेतृत्वको सरकार गठन भएको करिब अढाई महिनापछि सरकारले परराष्ट्रमन्त्री नियुक्त गरेको छ । नेपाली कांग्रेसका नेता तथा प्रधानमन्त्री देउवाका विश्वासपात्र डा. नारायण खड्कालाई परराष्ट्रमन्त्री नियुक्त गरिएको हो ।
मंगलबार साँझ बालुवाटारमा बसेको सत्तारुढ गठबन्धनका चार शीर्ष नेताको बैठकले डा. खड्कालाई परराष्ट्रमन्त्री बनाउने सहमति जुटाएको थियो ।
डा. खड्काले बुधबार दिउँसो १ बजे सितलनिवासमा शपथ लिने प्रधानमन्त्री देउवाको सचिवालयले जनाएको छ ।
शपथ लिएर पदभार ग्रहण गरेपछि राति ८ः३० बजे संयुक्त राष्ट्रसंघको महासभामा भाग लिन खड्का न्युयोर्क जाने कार्यक्रम छ । संयुक्त राष्ट्रसंघीय महासभाको साइड लाइन मिटिङका लागि परराष्ट्रमन्त्री नियुक्त गर्नुपर्ने दबाबमा सरकार थियो ।
न्यूयोर्कमा सार्क राष्ट्रका विदेशमन्त्रीको भेला पनि हुँदैछ। त्यसका लागि परराष्ट्र मन्त्री आवश्यक पर्छ । मंगलबार नै सिंहदरबारमा बसेको मन्त्रिपरिषद् बैठकले राष्ट्रसंघको महासभामा सहभागिता जनाउन प्रतिनिधिमण्डल गठन गर्ने निर्णय गरेको थियो ।
असार २९ मा प्रधानमन्त्री बनेका देउवाले त्यसै दिन कांग्रेसबाट २ र माओवादीबाट २ जनालाई मन्त्री बनाउनुभएको थियो भने साउन १० मा उमेश श्रेष्ठलाई स्वास्थ्य राज्यमन्त्री बनाउनुभएको थियो । दल विभाजनसम्बन्धी अध्यादेश तथा सत्तारुढ दलहरुबीच भागबण्डा नमिल्दा मन्त्रिपरिषदले अझै पूर्णता पाउन सकेको छैन ।
