डबल बोगटी, धनगढी ।
अखिल (छैठौं) ले भारतीय प्रधानमन्त्री नरेन्द्र मोदीको पुत्ला दहन गरेको छ ।
कैलालीको सदरमुकाम धनगढीस्थित अत्तरिया चोकमा विरोधसभा गर्दै अखिल (छैठौं) ले पुत्ला दहन गरेको हो ।
दार्चुलामा एसएसबीले तुइन काटिदिँदा मृत्यु भएका जयसिंह धामीको हत्यारालाई कारबाही गर्नुपर्ने र केही दिनअगाडि नेपाली भूमिमा भारतीय हेलिकोप्टर उडाइएको विरोधमा सो कार्यक्रम भएको अखिल (छैठौं) कैलालीले जनाएको छ ।
कार्यक्रममा सम्बोधन गर्दै अखिल (छैठौं) का केन्द्रीय सदस्य हेमराज भट्टले जयसिंह धामीको हत्या र नेपाली भूमिमा हेलिकोप्टर उडाउनु भारतीय दादागिरी नै भएको बताउनुभयो ।
तथ्यहरूले भारतीय एसएसबीले तुइन काटेका कारण दार्चुलामा जयसिंह धामीको मृत्यु भएको पुष्टि भइसकेको बताउँदै भट्टले अगाडि भन्नुभयो– ‘भारतीय साम्राज्यवादले यस घटनामा तुरुन्त माफी माग्नुका साथै जयसिंहका परिवारलाई क्षतिपूर्ति दिनुपर्दछ ।’
त्यस्तै, राष्ट्रिय जनमोर्चा कैलालीका सचिवालय सदस्य डबल बोगटीले पनि सिमानामा भारतीय ज्यादतीले सीमा नाघेको बताउनुभयो ।
नेपाल सरकारलाई भारतको यस खालको ज्यादतीको विरुद्धमा उभिन आग्रह गर्दै बोगटीले भन्नुभयो– ‘नेपाल सरकारले जयसिंह धामीको हत्यारालाई कारबाही, क्षतिपूर्ति र नेपाली भूमिमा भारतीय हेलिकोप्टर उडाउनु जस्तो अन्तर्राष्ट्रिय कानुन विरुद्धको कार्यका विरुद्ध पहलकदमी थालिहाल्नुपर्दछ ।’
कार्यक्रमको क्रममा अखिल (छैठौं) र राष्ट्रिय जनमोर्चाका कार्यकर्ताहरूले जयसिंह धामीको हत्यारालाई कारबाही गर, जयसिंह धामीका परिवारलाई क्षतिपूर्ति दे, नेपाली भूमिमा भारतीय हवाइ उडान बन्द गर, भारतीय साम्राज्यवाद मुर्दावाद, अखिल (छैठौं) जिन्दावाद, राष्ट्रिय जनमोर्चा जिन्दावादलगायतका नाराबाजी गरेका थिए ।
