वीरेन्द्रनगर । समावेशी शिक्षा अध्ययन–अध्यापनका लागि मध्यपश्चिम विश्वविद्यालयले अन्तर्राष्ट्रिय स्तरको दुई विश्वविद्यालयसँग सम्झौता गरेको छ ।
मध्यपश्चिमाञ्चल विश्वविद्यालयले स्नातकतहसम्म समावेशी (विशेष) शिक्षा पठनपाठनका लागि २०७८ भदौ ९ गते चङआङ विश्वविद्यालय कोरिया र ओस्लोमिट विश्वविद्यालय नर्वेसँग आपसी समझदारी पत्रमा हस्ताक्षर गरेको हो ।
सो विश्वविद्यालयको शिक्षाशास्त्र सङ्कायले शिक्षाशास्त्र केन्द्रीय क्याम्पसमा आगामी शैक्षिकसत्रदेखि स्नातकतहमा समावेशी शिक्षा शिक्षण गर्ने कार्यक्रमको तयारी थालेको विश्वविद्यालयका उपप्राध्यापक एवम् शिक्षाशस्त्र सङ्कायका पूर्व सहायक डिन विष्णुकुमार खड्काले जानकारी दिनुभयो ।
कोरियाको चङआङ विश्वविद्यालयसँग लिडिङ युनिभर्सिटी प्रोजेक्ट फर इन्टरनेसनल कोअपरेसन (लुपिक) परियोजनाअन्तर्गत भएको किक अफ बैठकलाई सम्बोधन गर्दै मपका उपकुलपति प्राडा नन्दबहादुर सिंहले विश्वविद्यालयलाई नयाँ र समसामयिक विषयमा युग सुहाउँदो कार्यक्रम अगाडि बढाउने धारणा राख्नुभएको थियो ।
विशेष आवश्यकता शिक्षा अर्थात् समावेशी शिक्षा कार्यक्रमसँग सम्बन्धित नर्वेजियन प्रोग्राम फर क्यापासिटी डेभ्लोप्मेन्ट इन हाइएर एजुकेसन एन्ड रिसर्च डेभ्लोप्मेन्ट (नोरहेड) परियोजनामा नर्वेका ओस्लोमिट विश्वविद्यालय, इनल्यान्ड भ्याली एप्लाइड साइन्स विश्वविद्यालय र नेपालका त्रिभुवन विश्वविद्यालय, मध्यपश्चिम विश्वविद्यालय साझेदार संस्थाका रूपमा रहेका छन् ।
लुपिक परियोजनाअन्तर्गत दक्षिण कोरियाको चङआङ विश्वविद्यालय र नेपालका सुदूर पश्चिम विश्वविद्यालय, मध्यपश्चिम विश्वविद्यालय, पूर्वाञ्चल विश्वविद्यालय तथा पोखरा विश्वविद्यालय साझेदार संस्थाका रूपमा रहने जनाइएको छ ।
