काठमाडौँ । वैदेशिक रोजगारीमा गएका नेपालीका समस्याबारे छलफलको माग गर्दै प्रतिनिधि सभामा “जरुरी सार्वजनिक महत्त्वको प्रस्ताव” दर्ता भएको छ ।
सांसद डिला सङ्ग्रौला प्रस्तावक र प्रमिला राई तथा रामबहादुर विष्ट समर्थक भएर प्रस्ताव दर्ता गरिएको हो ।
२०७८ साउन २२ गते संसद सचिवालयमा दर्ता गरिएको प्रस्तावमा छलफल गर्नुपर्ने पाँच कारण उल्लेख गरिएको छ ।
‘कोभिड–१९ का कारण विदेशमा रोजगारीमा रहेका नेपालीको समस्या, कोभिडबाट मृत्यु भएका व्यक्तिका परिवार तथा रोजगारी गुमाएका व्यक्तिलाई नेपाल सरकारको तर्फबाट भएको सहयोग र वैदेशिक रोजगार असुरक्षित भएकाले त्यसलाई सुरक्षित बनाउन सरकारको योजनालगायतका विषयमा सङ्घीय संसद प्रतिनिधि सभामा जरुरी सार्वजनिक महत्त्वको प्रस्ताव दर्ता भएको’ जनाइएको छ ।
सो सम्बन्धमा छलफल गर्नुपर्ने पाँच वटा बुँदा यस्ता छन् :
१) कोभिड–१९ बाट सृजित समस्याले वैदेशिक रोजगारमा कतिले ज्यान गुमाए ? कतिले रोजगारी गुमाए ? कति स्वदेश फर्किए ? त्यसको विस्तृत तथ्याङ्क सरकारसँग माग गर्न।
२) कोभिडबाट मृत्यु भएका व्यक्तिका परिवार तथा रोजगारी गुमाएका व्यक्तिलाई नेपाल सरकारको तर्फबाट के कस्तो सहयोग भएको छ ? त्यसको जानकारी माग गर्न ।
३) वैदेशिक रोजगारबाट फर्केका र स्वदेशमै पनि बेरोजगार भएका व्यक्तिलाई सरकारले के कस्तो राहत र रोजगारीको व्यवस्था गरेको छ ? प्रदेश सरकार र स्थानीय निकायसँग समन्वय गरी स्थानीयस्तरमै रोजगारी सिर्जना गर्ने योजना के छ ? त्यसको विस्तृत जानकारी माग गर्न ।
४) वैदेशिक रोजगार असुरक्षित भएकाले त्यसलाई सुरक्षित बनाउन सरकारको योजना के छ ? अहिलेसम्म सम्झौता तथा समझदारी भएका मुलुकमा अनुगमन किन नभएको हो ? अब कुन कुन देशसँग अनुगमन र श्रम सम्झौता हुँदै छ ? त्यसको जानकारी सरकारसँग माग गर्न।
५) रोजगार सेवा केन्द्रको अवस्था कस्तो छ र यसले कसरी काम गरिरहेको छ भन्ने कुराको जानकारी माग गर्न ।
