काठमाडौँ । ४५६ मेगावाटको माथिल्लो तामाकोसी आयोजना उद्घाटन भएको दुई हप्तामै बन्द भएको छ । परियोजनाको पहिलो र दोस्रो युनिटमा समस्या देखिएपछि विद्युत उत्पादन बन्द भएको छ ।
यो आयोजनाको पहिलो युनिटबाट ७६ मेगावाट उत्पादन सुरु गर्दै तत्कालीन प्रधानमन्त्री केपी शर्मा ओलीले असार २१ मा उद्घाटन गरेका थिए ।
‘उद्घाटन गर्दा पहिलो युनिटबाट करिब १० मिनेटजति आठ मेगावाट विद्युत उत्पादन भएको थियो’ आयोजनाले भनेको छ– ‘प्राविधिक समस्या देखिएपछि लगत्तै पहिलो युनिट बन्द भएको छ ।’
उद्घाटनको चाँजोपाँजो चाँडो मिलाउन प्रधानमन्त्री कार्यालयले आयोजना व्यवस्थापनलाई दबाब दिँदै आएको थियो । सर्वोच्च अदालतले प्रतिनिधि सभा पुनःस्थापनासम्बन्धी आदेश दिनुअघि नै ओलीले आयोजना उद्घाटन गर्ने इच्छा राखेपछि प्रधानमन्त्री कार्यालयले उद्घाटनको व्यवस्था मिलाउन ताकेता गरेको थियो ।
माथिल्लो तामाकोसीको दोस्रो युनिट पनि मङ्गलबारदेखि राष्ट्रिय प्रणालीमा जोडिएको थियो तर अहिले दोस्रो युनिट पनि बन्द रहेको भार प्रक्षेपण केन्द्रले जानकारी दिएको छ । नेपाल विद्युत प्राधिकरणका कार्यकारी निर्देशक एवम् माथिल्लो तामाकोसी जलविद्युत कम्पनीका अध्यक्ष हितेन्द्रदेव शाक्यले आयोजनाको पावर ट्रान्सफर्मरमा समस्या देखिएपछि अहिले कुलेखानी जलविद्युत आयोजनामा लगेर मर्मत गर्ने काम भइरहेको बताए ।
आयोजनाका प्रवक्ता गणेश न्यौपानेले साउन १५ बाट मात्र आयोजनाले व्यावसायिक उत्पादन थाल्ने भएकाले अहिले परीक्षणका क्रममा सामान्य प्राविधिक समस्या आएको बताए । उनले साउन १५ भित्र आयोजनाको तेस्रो युनिटबाट पनि विद्युत उत्पादन सुरु हुने जानकारी दिए ।
माथिल्लो तामाकोसीबाट उत्पादित विद्युत आयोजनास्थलबाट २२० केभी डबल सर्किट प्रसारण लाइनबाट न्यु खिम्ती सबस्टेसन हुँदै खिम्ती–ढल्केबर प्रसारण लाइनमार्फत राष्ट्रिय प्रणालीमा जोडिएको छ । यो आयोजना पूर्ण रूपमा सञ्चालनमा आएपछि वर्षायाममा नेपाल विद्युतमा आत्मनिर्भर हुने छ । उच्च माग हुँदा र सुक्खायाममा विद्युत माग धान्न भारतबाट आयात भइरहेको छ ।
पाँच वर्षमा निर्माण सक्ने लक्ष्यका साथ २०६७ मा सुरु भएको आयोजनाको उत्पादन थाल्ने मिति छ वर्ष पर धकेलिएको थियो । (एजेन्सी)
